Сарпан услврин сурвлҗна ясвр эклв

Октябрьск районд Сарпан услврин сурвлҗна ясвр эклҗәнә. Хальмгин селәнә эдл-ахун министр Гаван Тимур Хальмг Таңһчд селәнә эдл-ахун халхиг усар тетклһнә болн мелиорацин заллтын һардач Гусейн Исаевла хамдан көдлмшин йовудыг бүрткв. Эн сурвлҗн 1960 җилд эдлврт орулгдад, тер цагас авн ясгдад уга. Давсн кесг арвад җилмүдин туршарт усар тетклһн хойр холванд баһрад, селәнә эдл-ахун тәрә тәрлһнд харшлтан күргҗәнә.
– Бат ясврин йовудт эн цеврлгдәд, кергсл сольгдхмн. Эн төсв күцәлһнд 100 сай арслң йилһгдв. Көдлмш цаг-болзгтнь күцәгдәд, таңһчин ар үзгин райодт тутрһ урһалһнд болн селәнә эдл-ахун хот кеҗ һарһлһнд туслхмн. «Калммелиоводхоз» ФГБУ-д 2025 җил төгстл көдлмшән күцәх даалһвр өггдв. Эн төрт дөң-тусан күргсн Әрәсән селәнә эдл-ахун министрин дарук Максим Боровойд ханлтан өргҗәнәв, – гиҗ Тимур Сергеевич товчлв.
ОЛЬДАН Цаһан