Балһсна көлгн яһҗ көдлнә

Өдгә цагин балһсна бәәдл-җирһлд көлгн нег онц орман эзлнә. Өдр болһн әмтн көдлмштән адһҗ зогсалмудт кергтә тойгта көлгән күләнә. Орн-нутгин регионмудт балһсдын олн-әмтиг зөөдг көлгнә делгрүллһн социальн-экономикин халхин нег нәрн төр болна. Балһсдар йовдг көлгиг 80 процент улс олзлна. Элстин бәәрн улс балһсар йовдг олна көлгнә то цөн гиҗ даңгин келнә. Өрүн көдлмштән, асхнднь гертән күрхин төлә зогсалмудт уданар күләх кергтә болна. Шидр мана хотл балһснд көлгнә йовлһн яһҗ бүрдәгдгиг медхәр Элст балһсна һардврин толһач Лиҗикә Алдрла хамдан «Элст ГорТранс» МАУ-д йовад соньмсвидн.
– Җил хооран Хальмгин Толһач Хаска Батун нилчәр СИМАЗ тамһта 20 һар автобус хулдҗ авгдла. Тер мет мана балһснд өдгә цагин некврлә ирлцдг зогсалмуд углҗ тәвгдв. Онц темдглхәс, кадрмудын төр хаһлхин төлә ода бүрдәцд көдлхәр ирсн улс му биш җалв авч чадна. Эннь 150 процентд өсв, – гиҗ Алдр Васильевич цәәлһҗ келв.
Эндр «Элст ГорТранс» бүрдәцд ут тоодан зун хөрн шаху күн көдлнә. Тедн дунд җолачнр, слесарьмуд, механикүд, диспетчермүд мөн. Өдр болһн Элстин хаалһст 30-35 автобус һарна, урднь болхла хөрн шаху автобус йовдг билә. Иргчдән 50 автобус күртл Элстәр йовулхар зуралгдҗана. Элст дотран әмтиг зөөсн деерән, Аршан, Бурата, Вознесеновка болн талдан поселкуд күртл бас көлгн йовна.
«Элст ГорТранс» МАУ-н һардач Сасыка Александрин келсәр, мана бүрдәцд көдлдг улс 69 миңһн арслңгас авн җалв авна. Кесгинь немр час авад энүнәс үлү җалв авчана. Эндр күртл бүрдәцд көдлмшч сул ормс бәәнә. Мергҗлтнриг белдхин төлә ДОСААФ-ла бооца батлад, мана тал көдлхәр ирсн улсиг тиигәрән шишлң сурһульд йовулнавидн, гиҗ Александр Викторович темдглв.
Өрүн болн асхн болһн көдлмштән ирсн җолачнриг медицинск көдләч хәләҗ шинҗлнә. Энүнә дару җолачнр балһсна уульнцсар йовдг зөв авна. Терүнәс нань жолач хаалһдан һарч йовхин өмн көлгән шишлң бәәрнд орулад, тенд слесарь болн механик автобус эвдсинь угай хәләнә. Теднәс бас зөв авад, җолач хаалһдан һарад йовна.
Немхәс, одахн Элстд болсн шар шаҗна нарт-делкән хургин болн Энткгәс авч ирсн Бурхн Багшин әрүн тоот үзүлсн өдрмүдт «Элст ГорТранс»-ин көлгн өрүн эртәс авн асхн ора күртл олн-әмтиг зөөв. Нег һазра улс ик хургин талвңгудт болн төв хурлд күрч чадв.
– Балһсна көлгнә йовлһиг цааранднь улм делгрүлхәр зуралҗанавидн, кех-күцәх тоотнь баһ биш, эн туст цуг таал тогтагдҗана, – гиҗ Лиҗикә Алдр ашлв.

КАРСАНА Евгения