Дәәчнрин нерд илдкҗәнә

Хальмг Таңһчин хәәврин багмуд «Санлын харулын» дарани кемиг шидр эклв. Эн керг-үүлдвр «Цустсн цаһан өвсн» («Обагренный ковыль») гидг төсвин кемҗәнд күцәгдҗәнә. Президентск грант шүүҗ авсна ашт цуг эннь бәәдл-җирһлд тохрагдҗана.

Талдан һазрас ирсн хәәврин багмудла хамдан Хальмгин хәәврин баг үүлдврән делгрүлҗәнә. Новороссийскин, Сарпулин болн Москван хәәврин багмудын элчнр Хулхтын эргнд хәәврин көдлмш кев. Хәәврин көдлмшәс нань эдн цергчнр оршагдсин бәәрнсиг цеврлҗ яслһна көдлмш кеҗәнә. Дәәнә цагт энд дәәлдҗ йовсн цергчнрин нердиг илдкҗ тохнята көдлмш эдн күцәнә. Иигәд нег бәәрнд хәәһәчнр советск цергчин цогцин үлдл эдн илдкв. Салдсин окопд немшин мин туссн бәәдлтә гиҗ тоолгдҗана.
Дәәлдән хоорнд цергчнр цуглрдг бәәсн блиндажмудыг хәәһәчнр шинҗлҗ бүрткв. Хәәврин көдлмш кегдҗәсн нег өдр нааран Ростовск мүҗәс нег күн ирв. Хулхтын эргндк дәәлдәнд әмнәсн хаһцсн элнцг аавин өңгрсн һазринь хәәҗ авхар ирсн болҗ һарв.
Тиигәд тер күн хәәврин көдлмшт орлцад, энд үүлдҗәх көвүдин дөңгәр элнцг аавнь өңгрсн бәәриг олҗ авв. 34-ч гвардейск хаһачнрин дивизин дәәч Иван Бровков оршагдсн һазринь чигн эдн олҗ авв. Эн 1942 җилин үкр сарин 21-д әмнәсн хаһцсн бәәҗ. Хулхт селәнә тал дунд ах-дүүһин үкәрт эн дәәчиг оршасн бәәсиг хәәврин баг илдкв. Иргчдән Диилврин өдрлә цуг өрк-бүләрн нааран ирҗ, күндллһән медүлхәр тер күн герүрн хәрв. Сүл салдсин үкәр эс олдтл дән төгсәд уга, гиҗ келсн үг үнн болҗахиг эн йовдл медүлҗәнә. Алдр Диилврин найн җилин өөн темдглгдсн бийнь кесг дәәчнрин нерд ода күртл олдад уга, альд тедн ясан хайсинь чигн илдәд уга.
Тегәд хәәврин багмуд цааранднь эн көдлмшән кеҗәнә.

УШКАНА Сувсн