Эрмдгтә улсин төрмүд хәләгдв

Шидр Хальмг Таңһчин Улсин Хуралд (Парламентд) Хальмг Таңһчин Толһачин элч Манҗин Арашин һардврт гемтә-шалтгта улсин төрмүдәр үүлддг хүүвин дарани селвлцән болв. Терүнд таңһчин социальн делгрлтин, күч-көлснә болн көдлмшәр тетклһнә министрин дарук Һәрән Ольга, күүнә болн бичкдүдин зөв харсдг элчнр Валерий Чуб болн Чужан Наталья, таңһчин Улсин Хуралын депутат Эрднин Гилән, «Баатрмуд 08» көтлврт орлцач Трофима Дольган, эрмдгтә улсин олна бүрдәцсин элчнр орлцв. Селвлцәнд эрмдгтә улсиг спортар соньмсуллһна, балһсна сурһуль-эрдмин бүрдәцст сән кец-таал тогталһна төрмүд хәләгдв.
Сүл һурвн җилин эргцд гемтә-шалтгта улсин адаптивн спортын туст күцәгдсн көдлмшин аш диглгдв. Тиигәд, эрмдгтә улсин цогц-махмуд батруллһна, спортар соньмсуллһна 80 керг-үүлдвр давулгдв гив. Спортивн белдврин көтлврт урднь 70 күн орлцдг бәәсн болхла, ода теднә то 265 күртл өсв гиҗ темдглгдв. Гемтә-шалтгта улс олн зүсн марһаст орлцҗ, сән күцәмҗ бәрдгнь ончта.
Хотл балһсна сурһуль-эрдмин бүрдәцст гемтә-шалтгта бичкдүдин төлә сән таал тогталһна төрт селвлцәнд орлцачнр ик оньг тусхав. Иим бичкдүд чинртә сурһуль болн сурһмҗ авхин төлә бүрдәцст олн зүсн эв-арһс олзлгдна, бачм дөң кергтә болхла докъя өгдг кергсл бәәнә. Дунд сурһульмудт олн халхин мергҗлтнр көдлнә, эдн эрмдгтә бичкдүдт дөң болҗ, олн зүсн туслмҗ күргнә.
Гемтә-шалтгта улсин олна ниицәсин элчнр селвлцәнд хәләгдсн төрмүдәр ухан-тоолврарн хувалцҗ, сүв-селвгән орулв.

БАТАН Сәәхлә