Парламентин бүрдәцин хургт

Хальмг Таңһчин Улсин Хуралын (Парламентин) делегац Карачаево-Черкессь Республикин Архыз селәнд болсн Ар Кавказин парламентск Ассоциацин (АКПА) хургт орлцв. Хальмгин делегацин ханьд таңһчин Улсин Хуралын Ахлач Артем Михайлов, энүнә дарук Бадмин Вячеслав, депутат Саңһҗин Лаг орв.

Хургт орлцачнр ут тоодан 26 төрәр күүндәд, терүгәр зака үүдәгч седвәр татад, орн-нутгин күчәгч болн зака үүдәгч бүрдәцст йовулх шиидвр авв. Тиигәд, хәләгдсн төрмүд дунд өнчн бичкдүдин зөв харслһна, уулта һазр делгрүллһнә болн харлһна, насни дигт күрәд уга бичкдүдиг әср йовдлмудас гетллһнә болн нань чигн төрмүд заахмн. Таңһчин Улсин Хуралын Ахлач Артем Михайлов Ар Кавказин парламентск ниицәнә Хүүвин сүүрт орлцв. Энүнә дарук Бадмин Вячеслав селәнә эдл-ахун болн йиртмҗ харлһна төрмүдин комитетин сүүрт орлцв, терүнд тәрәнә эк олзллһна болн аң-аһрусна туск закадт сольвр оруллһна төрмүд хәләгдв.
Ар Кавказин парламентск Ассоциац 2011 җилд Кабардино-Балкарин Парламентин седвәрәр бүрдәгдсмн. Терүнә медлд долан региона зака үүдәгч хургуд орна. Әрәсән Өмн үзгин Парламентск Ассоциацин ханьд ордг Хальмгин, Адыгейин, Аһшин болн Әәдрхнә мүҗсин зака үүдәгч хургудын депутатнрт АКПА-н 12-ч хургт орлцх үрвр кегдсн билә. Дарани хург 2026 җилд Дагестанд болхмн.
ДООҖАН Наталья