Уйн наста зурачнриг ачлв

Хальмг Таңһчин Улсин Хуралын (Парламентин) Ахлач Артем Михайлов «Мини эцк – Баатр» гидг зургудын марһанд диилвр бәрсн бичкдүдиг ачллһна керг-үүлдврт орлцв. Хальмг Таңһчин залврин Ахлач Босхмҗин Гилән, «Герои 08» көтлврт орлцачнр билгтә бичкдүдиг ачлв.

Эн марһан Төрскән харсачнрин өрк-бүлмүдин таңһчин комитетин седвәрәр эцкин Өдрт нерәдгдҗ бүрдәгдсмн. Ут тоодан 100 һар күүкн-көвүн зургудан зурад, жюрин гешүдин оньгт тусхав, тегәд хамгин сәәнинь йилһҗ авхд амр болсн уга. Жюриг Хальмг Таңһчин ачта зурач Дорҗин Виктор ахлв.
- Эцкин Өдр мана орн-нутгт зуг одахн темдглдг болв, тер бийнь эн ик чинртә болн темдгтә сән өдр мөн. Эцк өрк-бүлин толһач болна, эн өрк-бүлән болн Төрскән харсна. Эн марһан дорас өсч йовдг бичкдүдт төрскнч сурһмҗ өглһнд эрк биш туслна. Җил ирвәс терүнд орлцҗадг уйн наста зурачнрин то өсчәхнь байрта, – гиҗ Артем Васильевич келв.
Марһана ашар Увшан Милена, Нохан Өлзәт болн Аяна, Кокан Сәәхә, Нарна Мартин, Аделина Испусинова, Мухаран Баир, Темуркан Элина болн Салман Гаджикурбанов диилвр бәрәд, Күндллһнә һашгар болн үнтә белгәр ачлгдв. Таңһчин Улсин Хуралын Ахлач Артем Михайлов, таңһчин залврин Ахлач Босхмҗин Гилән, таңһчин цергә комиссариатын һардачин нөкд Валерий Лукьянченко бичкдүдиг йөрәһәд, ачлвринь бәрүлҗ өгв. Гилән Герасимовна эн марһа бүрдәсн Төрскән харсачнрин өрк-бүлмүдин комитетин ахлач Кокан Виталияд ханлтан өргәд, дорас өсч йовдг баһ үйд төрскнч сурһмҗ өглһнд, өрк-бүлин чинр батруллһнд болн эцкин даавр өөдлүллһнд тәвцән орулҗахинь онц темдглв.
Бичкдүдин үүдәлтин бәәшңд болсн керг-үүлдврт орлцачнр цергә болн спортын белдврин «Дәәч» төв белдсн зургудын һәәхүл хәләв. Терүнд цергә шишлң керг-үүлдврт залу-зөрмгән үзүлсн мана нег һазра улсин зургуд олнд үзүлгдв. Таңһчин нертә артистнр болн уйн наста билгтнр ду-бииһәрн олн-әмтиг байрлулв.
ДООҖАН Наталья