Олн келн-улсин элчнрин нөкцлт

Цергә шишлң керг-үүлдврин ветеран, Элст балһсна Хургин депутат Чумуда Николай Дагестан Республикд одад, Кизлярск района толһач Аким Микировла харһв.

Терүнә йовудт «Уулын туурмҗ» көтлврин тускар соңсч, мана ирлцңгү «Баатрмуд-08» көтлврин тускар Николай Санджи-Горяевич бас келв.
– Тер мет одахн Элстд болсн шар шаҗна нарт-делкән хургин тускар келәд, Аким Микировд Элстд ирхиг үрвр кегдв. Мана хойр республик хам-хоша бәәдг төләдән бидн нег-негән дөңнәд, дамшлтарн хувалцх зөвтәвидн. Тенд цергә үр Айгум Ногаевла бас харһад, ода болхла эвин бәәдлд олна кергин төлә хамдан көдлҗәнәвидн. Тиим харһлтсин йовудт олн келн-улс негдәд, үүрләд бәәхлә мел энүнд мана күчн гисиг меднәч, – гиҗ Чумуда Николай темдглв.
Тер өдр СВО-н ветеран «Санлын Садт» бас одв. Тенд суулһсн модн болһн дәәчнрин тууҗла залһлдата. Эн сад Төрскән харсгч Алдр дәәнд орлцачнрин болн мана цагт төрскн һазриннь төлә әмән өгсн баатрмудын санлынь әрүнәр хадһлдг орм болна. –Хальмг Таңһчин болн Дагестана улс дәәнд, күч-көлснд, эвин бәәдлд чигн олна кергин төлә даңгин хамдан көдләд йовдмн. Өвкнрән күндлҗ, дорас өсч йовдг үйнрт төрскн һазран яһҗ делгрүлхиг эднд зааҗ йовнавидн, гиҗ Чумуда Николай товчлв.

КАРСАНА Евгения