Дууна авлгч күчн

Цевгә Төлән нертә дууна коллектив эн җилә концертсән эклҗәнә. Хальмг госфилармоня медлд үүлддг эн коллектив таңһчдан болн Әрәсәд темдгтә. Хулһн сарин 29-д дарани кемән байрин бәәдлд эклв.

Нертә дууч, дуунд дурта олн улсин дуринь суңһсн билгт Цевгә Төлә бүрдәсн дууна коллектив Хальмгин сойлын җирһлд бат орман олҗ, һучн һар җилин туршарт олн-әмтиг дууһарн байрлулҗ йовна. Хальмг улсин олн ду сергәҗ, улсин җирһлд шинәс орулҗадг коллективиг әмтн цугтан меднә. Делкән болн орсин көгҗмин болн дууна эрдмд олар дуулгддг кесг ду чигн хальмг коллектив билгтә кевәр күцәнә. Нарт-делкән, региона болн Цугәрәсән кесг марһанд Цевгә Төлән нертә коллектив даңгин өөдән үнлгднә. Бурхн-шаҗна төрәр һарһсн кесг ду, айсин өөдмд күргҗ нер һарсмн. Әрәсән телеүзлин соңсхврт хальмг коллектив дуулсн оюни чинртә дун орн-нутгин олн хәләһәчнрт тодлгдҗ, седклинь авлсн болдг. Сүл цагт коллектив Әәдрхнә оперн театрла нөкцҗ үүлдәд, нәрн янзар билг-эрдмән үзүлх таал учрсн болдг.
Бурхн-шаҗна мөргүлмүдт болн нань чигн йосрхл кегдсн цагт дуулгдҗ йовсн кезәңк номиг сергәһәд, дасад, дууна коллектив тедниг шаҗна байр болсн цагт дуулҗ, әмтнд номин евәлтә бәәдл тогтана. Шаҗна ик нарт-делкән хургин йовудт, Бурхн Багшин, терүнә ном цәәлһҗ тархаҗ йовдг шаҗна хувргудт нерәдҗ кегдсн көгҗмин магталд чигн Цевгә Төлән нертә дууна коллектив орлцсмн.
Дууна эн коллективин дөңгәр көгҗмин болн дууна делкәд тусад, ирсн әмтн цаган сергмҗтәһәр давулв. Дуучнр оларн дуулдг дуд ямаран соньн болдгиг әмтн медв. Манҗин Аркадин билгтә көгҗмиг соңсч, әмтн дәкнәс көгҗмчин сәәхн айсмудт авлгдв.
Катан Саврин болн Җимбин Бадмин үүдәврмүд чигн эн асхн әмтнә оньгт тусхагдв. Хальмгин сойлд батрсн, әмтнә тааслт олсн нань чигн олн дуд соңсгдҗ, ирсн әмтнә чикнә хуҗр хаңһав.
Хальмг улсин артистнр Очкан Анна болн Каҗин Елена, Хальмг Таңһчин ачта артистнр Һәрән Лиҗ, Месхишвили Инесса, Хальмг Таңһчин Толһачин мөрәһәр ачлгдсн Брюгидикә Айса дууна эрдмәрн олн улст байр үүдәв.
Хальмг улсин олн ду баһ наста дуучнр дуулснь әмтнд таасгдв. Кезәнәс авн дуулгдҗ йовх тер дуд сәәхн айсарн тааслт олсн деерән цагиг болн мадниг урдк үйнрлә залһсн болна. Тер олн ду Зулан Данзн, Баҗан Бадм, Петрушкинә Ольга сәәхн өргҗ дуулв.
Концертин шишлң гиич, Санкт-Петербургас ирҗ байрин үүлдврт орлцсн дууч, Хальмг Таңһчин Толһачин мөрә авсн Бадм-Хаалһин Байрта дуулсн «Төгрәш» дун - хальмг дууна ке-сәәхниг болн айсин өвәрциг медүлсн болв.
Хальмг Таңһчин ачта артистк Цевгә Нигмр, Эднәшә Дмитрий, Арутюна Владислав, Дорҗ-Һәрән Сергей көгҗмин халхинь күцәв. Байрин концертин көтлвр художественн һардач Хальмг Таңһчин билг-эрдмин ачта үүлдәч Ольга Сердюкован һардврт белдгдв. Ах хормейстер Дорҗин Екатерина, хормейстер Улана Цаһан коллективиг белдлһнд зөвтә тәвцән орулв. Хальмг Таңһчин улсин артистк Тепкән Вера концертиг һардҗ давулв.
Хальмг дууна эрдмиг делгрүлҗәдг коллектив таңһчд батлҗ тәвсн авъясмудыг цааранднь делгрүлҗ йовхиг эн концерт үзүлв.

ХӨӨЧИН Галина