Төрскн һазртан көдлҗәнә

Ик Буурла района Көвүд селәнд «Эрүл-менд бәәтн!» гидг керг-үүлдврин йовудт бәәрн болн хам-хоша бәәдг Зунда Толһа селәдин әмтн эмчнрт бийән үзүлҗ, кергтә шинҗллт кеҗ, эмнлһнә халхар мергҗлтнрин сүв-селвг авсн билә. Эн керг-үүлдвр дигтә-даратаһар бүрдәгдснд селәнә эмнлһнә эмч Кириша Гиләнән (зургт) тәвц бәәхнь маһд уга. Баахн эмч энүнә медлд бәәдг хойр селәнә әмтнд зәңгләд, медәтә, хуучта, эрмдгтә улст болн цергә шишлң керг-үүлдврт орлцачнрт эрк биш терүнд орлцхиг тодлулв.

Гилән Александровна «Земск эмч» гидг көтлврт орлцад, 2019 җиләс авн энд көдлҗәнә. Бийнь эн Ик Буурл селәнд өсәд-боссмн, энд дунд сурһулян төгсәсмн. Бичкнәсн авн спортар соньмсад, олн зүсн марһаст орлцдг төләдән эн диилвр бәрхәр зүткдг, эрк биш сән күцәмҗ бәрхәр шундг билә. Дунд сурһульд сурчасн цагтнь энүнд химийин кичәл таасгддг бәәҗ, тегәд экнь терүг медәд, эмчин эрдм шүүҗ авх селвг өгсмн. Күүкн эмч болхар санҗасмн уга, болв экиннь селвгәр Кубанск ик сурһульд сурсмн. Хөөннь эн Ростов-на-Дону балһснд ординатурт сурад, Аһш балһснд мергҗлтән өөдлүләд, олна дамшлтын эмчин эрдмтә болв.
- Күч-көлснә хаалһан би Элст балһсна поликлиникин әңгд эклләв. Әңгин эмч болҗ көдлхд амр биш, өдр болһн кесг күүнлә харһад, эмнлһнә туст селвгән өгх, саглуллһна керг-үүлдврмүд күцәх, олн зүсн бәрмт цаас белдх болн нань чигн көдлмш кех кергтә бәәсмн. Эмч тал нурһлҗ медәтә болн хуучта улс ирнә, тегәд күн болһнд килмҗән тусхаҗ, цәәлһвр өгч, эминь бичүлх кергтә болна. Сурһулян төгсәһәд шинкән экләд көдлхдм Кириша Айса нанд ик дөң-тус күргснд би ханлтта бәәнәв. Айса Николаевна цугинь нанд зааҗ, медсәрн хувалцҗ, олн зүсн бәрмт цаас белдхиг дасхв. Ах үүрм талдан көдлмшт һархла, би терүнә ормд әңгиг һардлав. Дөрвн җилдән тер әңгд көдләд, сән дамшлт хоршавув, – гиҗ Гилән Александровна келнә.
Нег дәкҗ Элстд урднь медҗ-таньҗ йовсн Эльза Лиджиевала харһв. Эмчин эрдм дасад, балһсна поликлиникд көдлҗәхинь медәд, Ик Буурла района эмнлһнә ах медицинск эгч бәәсн Эльза Бамбаевна төрскн һазртан ирхиг сурв. Тер харһлтын хөөн Ик Буурла района эмнлһнә һардврла күүндәд, «Земск эмч» гидг көтлврт орлцх шиидвр авв. 2019 җиләс авн Кириша Гилән Көвүд болн Зунда Толһа селәдин эмнлһст көдлҗәнә. Байн дамшлтта Шарманҗин Ирина, Шалдинә Яна, Уланкинә Вячеслав Байрта хойр ик дөң-тусан күргнә гиҗ баахн эмч темдглнә.
- Эдн олн җилдән эрүл-менд харлһна халхар көдлҗ йовна, бәәрн улсиг сәәнәр меднә, тегәд күн болһна авг-бәрциг учртан авч, нәәһинь олҗ авна. Эмнлһиг, эрүл-мендин бәәдлин шинҗллтиг эс гиҗ саглуллһна тәрлһиг цаглань кехиг, эмиг бичүлҗ авхиг эдн диглнә. Эднә нилчәр «Эрүл-менд бәәтн!» гидг керг-үүлдвр сән йовудтаһар бүрдәҗ давулгдв. Әмтн маммографь, УЗИ, флюорографь кеһәд, таңһчин эмнлһсин мергҗлтнрт бийән үзүлв. Тегәд ямр нег гем түрүн болҗ илдкгдсн улст немр шинҗллт кех селвг өггдв. Намрин эклцәр бидн әмтнд гриппәс саглуллһна тәрлһ кеһәд, хамгин түрүнд медәтнрт болн хуучта улст оньг тусхаҗ, хальдврта гемәс гетлвидн, – гиҗ Гилән Александровна келнә.
Кириша Гилән Ик Буурла районд экләд көдлхд дигтә коронавирусн гемин туст нәрн бәәдл тогтсн билә. Энүнд гемтсн улсин төлә шишлң эмнлһнә үүлдвр бүрдәх даалһвр өггдсмн, тегәд эн цугтаһаснь түрүлҗ госпитальд көдлсмн. Урднь үзгдәд уга әәмшгтә гемәс хөрлһнә, эмнлһнә керг-үүлдврмүд күцәлһнә туст эн байн дамшлт хоршаҗ авв.
Гилән Александровна көдлн бәәҗ хойр үрән һарһад, өрк-бүлдән килмҗән тусхана. Авальтаһан хамдан эдн күүкдтән чик сурһмҗ өгч, үлгүр болхар шунна. Эркина күүкнь 3-ч класст сурна, эн зург зурхдан дурта. Бичкн Аюш дөнтә, эн бичкдүдин садт орна, спортын секцд цогц-махмудан батрулна. Баахн бер дассарн спортар соньмсад, сул цагтан «Ойрат-Арена» бүрдәцд боксин секцд орна. Ямр нег марһан болхла, эн района эмнлһнә багин ханьд бүрдәцин нер харсна.

ДООҖАН Наталья