Гер-бүүрәр теткхин төлә

«Баахн өрк-бүл» гидг шаңһа көтлвриг Хальмг Таңһчд күцәлһнә аш дигллһнд нерәдгдсн селвлцәнд баһчудыг гер-бүүрәр тетклһнә тускар күүндвр болв. Селвлцәг Хальмг Таңһчин залврин Ахлачин дарук Этән Алексей һардҗ давулв. Чинртә төрәр болсн харһлтд таңһчин баһчудын керг-төрин агентствин һардач Камиль Маркеев, райодын муниципальн бүрдәцсин болн хотл Элст балһсна һардврин элчнр орлцв.

- Мана орн-нутгт нилхд төрлһиг урмдуллһна, өрк-бүлмүдиг дөңнлһнә төрмүд эркн чинртә болна. Баһ наста улсиг, өрк-бүлмүдиг дөңнлһнә туст олн зүсн шаңһа көтлврмүд бәәнә, теднә негнь «Баахн өрк-бүл» көтлвр мөн. Эн көтлвр мана таңһчд ямр кевәр хаһлгдҗахиг шинҗләд, дуту-дундсиг чикләд, бәәх күцәмҗиг ясрулх күсл тәвгдҗәнә, – гиҗ Алексей Петрович келв.
Таңһчин баһчудын керг-төрин агентствин һардач Камиль Маркеев шаңһа көтлврин йовудт кедү өрк-бүл гер-бүүрин таал ясрулсна, ямаран райод терүг күцәмҗтәһәр күцәҗәхин тускар зәңгллһ кев. Дааврта һардачин келсәр, 2019 җиләс авн мана таңһчд ут тоодан 455 өрк-бүл шаңһа дем авв. Җил болһн 50-60 өрк-бүл эн көтлврт орлцна. Зуг 2020 җилд теднә то ик билә, тиигәд 88 өрк-бүлд шаңһас 39752,72 арслң йилһгдсмн. Эн җил 59 өрк-бүл эн көтлврин йовудт шин бүүртә болхмн, эн кергт 31381 арслң олзлгдхмн. Лаганя, Городовиковск болн Үстин райод эн көтлвриг күцәмҗтәһәр күцәҗ нүүрт йовна. Баһчуд нурһлҗ района төв селәнд эс гиҗ Элст балһснд патьр хулдҗ авхар шунна. Келхд, көтлврин некврәр өрк-бүл шаңһа мөңгәр таңһчин меҗә һатц гер-бүүр хулдҗ авх зөв уга. Эн көтлврт 35 нас күрәд уга баһчуд орлцҗ чадҗана. Үрн уга өрк-бүлд патьрин эс гиҗ герин үнәс 30 процентинь, үртә болхла 35 процентинь шаңһ даана, наадк мөңгинь баһчуд бийснь немх зөвтә.

ДАВАН Наталья