Теҗәлин кемҗәнә төсвин тускар

01-11-2025, 14:47 | Общество

Шидр Хальмг Таңһчин залврин Ахлачин дарук – таңһчин социальн делгрлтин, көч-көлснә болн көдлмшәр тетклһнә министр Өлзәтин Марина социальн-күч-көлснә хәрлцә дигллһнә комиссин дарани сүүр давулв. Терүнд 2026 җилд таңһчд сара хонга теҗәлин кемҗәнә төсвин, спорт делгрүллһнә, сурһуль-эрдмин бүрдәцст халун хотар тетклһиг бүрдәлһнә төрмүд хәләгдв.

Ирх җил эклхәс урд намрар теҗәлин кемҗән батлгдх зөвтә, тегәд ода көдлдг улсин, пенсионермудын болн бичкдүдин төлә терүнә кемҗән ямаран болхин туск төсвиг белдх кергтә гиҗ Марина Петровна келв. Тиигәд, тер төсвәр 2026 җилд көдлдг улсин төлә сара хонгин теҗәлин кемҗән 20230, пенсионермүдин төлә – 15962, бичкдүдин 18003 арслң болхмн гиҗ зуралгдҗана. Келхд, эннь 2025 җилд батлгдсн кемҗәнәс 6,8 процентд ик болна. Селвлцәнд орлцачнр эн төсвиг дөңнв, ода таңһчин залвр тогтавр батлх зөвтә.
Таңһчд спорт делгрүллһнә туст күцәгдҗәдг көдлмшин тускар Хальмг Таңһчин спортын министрин селвгч Гиндән Шорва зәңгллһ кев. Сүл җилмүдт таңһчд спортын халх делгрүллһнд ик оньг өггдҗәнә, келн-улсин төсвсин болн шаңһа көтлврмүдин йовудт шин талвңгуд тосхгдҗана. Ода мана таңһчд 142 миңһн күн спортар соньмсҗ, цаган тустаһар давулна. Эн җил Элст балһсна өмн үзгт шин ФОК эдлврт орулгдхмн, ирх җилд Троицкое селәнд болн Лагань балсһнд, 2028 җилд болхла Яшкулин болн Баһ Дөрвдә райодт бас тосхгдхмн гиҗ зуралгдҗана. Әрәсән болн нарт-делкән марһаст диилвр бәрәд нер һарсн спортсменмүдиг болн теднә тренермудыг мөрәлҗ урмдуллһна тускар бас келгдв. Урднь зуг бөк бәрлдәнә халхар күцәмҗ бәрсн спортменмүдиг ачлдг бәәсн болхла, ода талдан халхин элчнриг бас мөрәлнә. Спорт делгрүллһнә тускар келхләрн таңһчд олн халхин ик спортивн комплекс кергтә болҗахиг онц заагдв.
Сурһульчнриг халун хотар тетклһнә төрәр Хальмг Таңһчин сурһуль-эрдмин болн номин министрин үүл дааҗадг Александр Ким тооцаһан өгв. Сүл кесн то-дигәр, ода таңһчин сурһуль-эрдмин бүрдәцст 32378 күн сурчана, теднәснь 19378 сурһульч өңгәр, наадкснь эк-эцкнр орулсн мөңгәр халун хотар теткгднә. Эклц классмудт сурдг сурһульчнрас нань, гемтә-шалтгта, СВО-д орлцачнрин өрк-бүлмүдин бичкдүд өңгәр хот ууна. Олн үртә өрк-бүлмүдиг дөңнлһнә таңһчин заканас иштә өнр-өсклң бүлмүдин күүкдт халун хотд сар болһн 1310 арслңга демин мөңгн өггднә. Муниципальн бүрдәцсин һардврин шиидврәр нань талдан льгот олзлдг бичкдүдиг халун хотар тетклһнә төр хаһлгдна. Сүл җилмүдт таңһчин сурһульмудт бат ясвр кегдҗәхәс иштә хот болһдг хораст сән таал тогтагдв, өдгә цага кергсл углҗ тәвгдҗәнә гиҗ дааврта һардач темдглв. Бичкн селәдин сурһульмудт бичкдүдиг халун хотар тетклһнә төр ямр кевәр хаһлгдҗахиг шинҗлҗ дарук селвлцәнд тооцаһан өгхиг Өлзәтин Марина даалһвр өгв.
Селвлцәнд хәләгдсн төрмүдәр комиссин гешүд, «Герои 08» көтлврт орлцачнр Трафима Дольган болн Манҗин Мергн сурвр өгч, сүв-селвг орулв.
ДООҖАН Наталья

Видео