Эмнлһсин төр босхгдв

Хальмг Таңһчин залврин Ахлач Босхмҗин Гилән цус гүүлгдг төвин бат ясврин болн Приютное селәнд поликлиник тосхлһна төрәр селвлцә давулв. Хулһн сарин 25-д таңһчин залврин Ахлач бат ясврин йовудыг бүрткҗ, тенд давулсн селвлцәнд тосхлтын бүрдәцин үүлдвриг шинҗллһнә туст даалһвр өгсн билә.

Төвин бат ясвр 2025-2030 җилмүдт Хальмг Таңһчин социальн- экономическ делгрлтин көтлврин йовудт күцәгдҗәнә. Эмнлһнд өдгә цага сән таал тогталһнд ут тоодан 213,66 сай арслң йилһгдсмн. Ода деерән ясврин көдлмшин 75 процентнь күцәгдсн бәәнә, терүг бар сард төгсәхмн гиҗ зуралгдҗана. Ясврин көдлмшлә зерглҗ эмнлһиг кергсләр тетклһнә төр хаһлгдҗана, терүнд 40 сай арслң олзлгдхмн. «Монтажкапстрой» бүрдәцин үүлдвриг бүрткҗ, ясврин көдлмшиг өөдән чинртәһәр болн цаг-болзгтнь күцәх кергтә гисн неквр тәвгдв.
«Ут болн күцәмҗтә бәәдл-җирһл» гидг келн-улсин төсвин йовудт Приютное селәнд шин поликлиник тосхлһнд болн өдгә цага кергсләр тетклһнд 300 сай арслң йилһгдсмн. Эн эмнлһн тосхгдсна ашт Приютна района әмтнд сән чинртә туслмҗ күргҗ, олн зүсн шинҗллт кеҗ болхмн. Ода бәәрин ул, эрсмүд босхгдсн бәәнә, усар, дулаһар тетклһнә сурвлҗн тосхгдв. Тер мет кергтә медицинск кергсл хулдҗ авлһна төр хаһлгдҗана, тегәд тосхлтын көдлмш төгсхлә, терүг дарунь углҗ тәвхмн.
Шаңһа көтлврин болн келн-улсин төсвин йовудт ясгдҗадг болн тосхгдҗадг эмнлһс таңһчин әмтнд өөдән чинртә дөң күрглһнд эрк биш туслхмн. Тосхлтын көдлмшин йовудыг чаңһ кевәр бүрткҗ, шаңһа мөңгиг олзта-тустаһар олзлҗ, кергслиг цаглань хулдҗ авч цуг керг-үүлдврмүдиг сән чинртәһәр күцәхиг таңһчин залврин Ахлач Босхмҗин Гилән некв.
БАТАН Сәәхлә