Олн келн-улсиг хамцулсн байр

Үкр сарин 4-д мана орн-нутгт олн улсин ниицлтин Өдр темдглнә. Әрәсән тууҗд эн сән өдр 2005 җиләс авн экләд, эн җил дигтә хөрдгч кемдән темдглгдхмн. Эн байр XVII зун җиләс тууҗан эклнә, тер цагт Кузьма Мининә болн Дмитрий Пожарскийин һардврт Москва балһсн Польшин цергүдәс сулдхгдсн билә. 2004 җилд Әрәсән Хүүвин депутатнр эн тууҗиг сергәһәд, заканд сольвр орулад, орн-нутгин Президент Владимир Путин эн байриг батлсн болдг.

Әрәсәд бәәдг олн келн-улсиг негдүлхин төлә эн байр темдглдг болв. Орн-нутгин балһсдт болн селәдт эн сән өдриг өргнәр темдглдг авъяста. Төв талвңгудт олн-әмтн цуглрад, йосна элчнр нег һазра улсан йөрәҗ, күндллһнә темдгүдәр ачлна.
Москва хотл балһсна Улан талвңд бәәдг Кузьма Мининә болн Дмитрий Пожарскийин бумблвд гүрмр цецгүд тәвәд, терүнә дару ирлцңгү керг-үүлдврмүд давулгдна. Мана таңһчд болхла Элстин Диилврин паркд байрин концерт болн олн зүсн һәәхүл бүрдәгднә. Энд Әрәсән болн Хальмг Таңһчин тугмуд делснә. Дарунь таңһчин сойлын коллективс нег һазра улсан билг-эрдмәрн байрлулна. Келхәс, олна ниицлтин Өдр Хазна экин шүтәнә өдрлә ирлцнә. Элстин чонҗд ирлцнгү мөргүл болна. Тенд олн-әмтн цуглрҗ, таңһчд бәәдг олн келн-улс хоорндан ниитәһәр болн эрүл-менд бәәхин төлә зальврна.
Тер мет А.М.Амр-Санана нертә Келн-улсин дегтрин саңд сән өдр угтад, үкр сарин 3-д «Билг-эрдмин сө» нертә Цугәрәсән керг-үүлдвр давулгдхмн. Хальмгин симфоническ болн Келн-улсин хойр оркестр, таңһчин театрмудын артистнр, Чонкуша Петрин нертә билг-эрдмин колледжин оютнр, Әрәсән бичәчнрин ниицәнә Хальмг әңгин элчнр терүнд орлцхмн.
Онц темдглхд, өдгә цагт Әрәсән олн келн-улсин элчнр цергә шишлң керг-үүлдврт орлцад, әмән әрвллго Төрскән харсчана. Тедн хоорндан ахнр-дүүнр мет нег-негән дөңнҗ, олна кергән күцәҗәнә. Теднд хот-хол болн керглгдҗәдг нань чигн тоотыг күргәд, сән өдрлә бас йөрәхмн.
Ик кезәнәс авн эндр күртл мана орн-нутгт бәәдг олн келн-улс нег-негндән дөң-нөкд болҗ, байр-зөвлңган хамдан дааҗ һардг авъяста. Күндтә нег һазра улс, өөрдҗәдг сән Өдрлә цуг тадниг йөрәҗ, цаһан хаалһ дурдҗанавидн!
КАРСАНА Евгения