Иньгллтин җисән өргҗәд йовна

Олн улсин ниицлтин Өдрлә ирлцҗ таңһчар болн райодар кесг керг-үүлдвр болв. Тер тоод Элстин 21-ч тойгта сурһульд һардачин сурһмҗин халхар бәәдг селвгч Маргарита Пантюхован седвәрәр залһлдана эв-арһар талдан регионмудын сурһульчнрла соньн төрәр күүндвр болв. Терүнд багшнр чигн орлцҗ селвгән өгв.
Хальмг хувцта мана сурһульчнр келн-улсин тууҗин болн авъясин тускар келв. Әрәсән Федерацин кесг республикүдин болн мүҗсин элчнр бас эврә улсин тууҗин болн сойлын тускар келҗ өгв. Цааранднь чигн Хальмг Таңһчла болн талдан мүҗслә эврәннь иньгллтән өргҗүлх седклән медүлв.
– Мана сурһульчнр тиим керг-үүлдврт соньмсч орлцна, тиим кевәр эдн талдан регионмудын, теднә өдгә цагин бәәдл-җирһлин болн соньмсулҗадг билг-эрдмин, спортын болн нань чигн кесг салврин тускар медҗ авна. Эднлә цацу кесг сурһульчнрла сән таньл-үзл болҗ залһлда бәрнә. Тиим харһлтс манад тасрхан угаһар болна, тиим соньн керг кех цуг таал манад бәәнә. Элстин болн райодын талдан сурһульмудын элчнр мана тал гиичд ирҗ күүндврт орлцв, – гиҗ Элстин 21-ч тойгта сурһулин һардачин дарук Виктория Пахомкина темдглв.
Һардачин селвгч Маргарита Пантюховала хамдан эдн сән залһлда бәрҗ сурһульчнрин төлә соньн кесг керг-үүлдвр бүрдәнә. Ода Маргарита Рафаэльевна сурһмҗин төрәр болҗадг ик хургт йовв, тендәс ирәд улм соньн кергүдт сурһульчнриг орлцуллһна туск дамшлтарн хувалцх. Тиим кевәр 21-ч тойгта сурһульд бәәдл-җирһл йир соньн болна. Әрәсәд болн ЮФО-д болсн керг-үүлдврт бичкдүд болн арвтнр бас орлцҗ, таңһчиг сәәнәр элчлнә.
Төрскнч сурһмҗта керг-үүлдврт күндтә гиичнь болҗ СВО-д орлцач, «Дәәч» төвин элч, «Төрскндән ач-тус күргсн төлә» II девсңгин орденә болн «Залу-зөргин» медальмүдәр ачлгдсн Очан Санл орлцв. Цергә керг-үүлдврт кесг келн-улсин элчнрлә хамдан хортна күчиг уга кеҗәснә тускар келҗ өгв. Эдн цугтан залу-зөргтәһәр, нег-негндән дөң-түшг болҗ церглҗәнә. Ниицлтин сән өдрлә харһлтд орлцачнриг йөрәв. Тиим харһлт талдан регионмудын сурһульчнрт болн багшнрт икәр таасгдв, эдн зөргтә ветеранд кесг сурвран өгв.
Керг-үүлдврт Элстин 21-ч, 12-ч, Очра Номтын нертә 8-ч тойгта, 2-ч, Көглтин Даван нертә 17-ч тойгта, Басан Городовиковин нертә 18-ч, Аршан селәнә 15-ч, Городовиковск балһсна 3-ч тойгта сурһульмуд орлцв.
«Эн керг-үүлдвр мана сурһульчнрт талдан регионмудын арвтнрла таньлдх арһ өгв, тиим кевәр эдн олн келн-улсин залһлдаг батруллһнд нилчән күргҗәхән медв. Тиим туста ик керг күцәлһн эднд таасгдҗана. Нег-негндән бүлән үг келҗ, йөрәһәд таньлдв.
Әрәсән олн улс нег-негән дөңнәд бәәхлә, олна күчн чигн цааранднь батрх», – гиҗ багшнр тоолвран келв.
Тиим харһлтс цааранднь чигн болхмн. Тер мет талдан регионмудас багшнр болн сурһульчнр мана таңһчд ирҗ, хальмгудын сойлла болн тууҗла таньлдҗ, цааранднь чигн регионмуд хоорндк иньгллтиг өргҗүлхәр бәәнә.
ТҮРВӘН Һуна