Эрүл-мендин тускар ухалхмн

Хальмг Таңһчин Улсин Хуралын (Парламентин) сүл сессьт хәләгдсн төрмүд дунд эрүл-менд харлһна, чик авг-бәрц батруллһна тускар бас күүндвр болв. Таңһчин Улсин Хуралын Ахлач Артем Михайлов эрүл-мендин бәәдлән шинҗлҗ, эмчнрт дару-дарунь одх кергтә гиҗ депутатнрт дуудвр кев. «Күн болһн эрүл-мендин туст ик дааврта болх зөвтә. Нег үлү олна нүүрт бәәдг улс талдан әмтнд үлгүр болҗ, җил болһн давулгддг керг-үүлдврмүдт орлцҗ, эрүл-мендин бәәдлән шинҗх зөвтә. Ямр нег гемиг эртәр илдкҗ авхла цаглань эмнлһ кеҗ эдгәҗ болхмн. Тегәд чигн шаңһа үүл даадг улсин төлә эрүл-мендин тускар ухалад, шинҗллт кех таал тогтах кергтә. Эн көдлмшиг ахр цагин болзгт күцәхмн», – гиҗ Артем Васильевич темдглв.

Сессин көдлмшт орлцсн Хальмг Таңһчин эрүл-менд харлһна министр Саран Булат депутатнрин седвәриг дөңнәд, эн төрт дөңгән күргҗ эмчнрин баг бүрдәх болв. Депутатнр бас Артем Михайловин седвәриг дөңнв. Тиигәд, Октябрьск района эмнлһнә ах эмч Элдән Виктор диспансеризац давуллһн олн зүсн гемәс саглуллһнд ик чинр зүүҗәхиг темдглв. Депутат Мацга Татьянан келсәр, суңһачнрла болдг харһлтст чинртә төрмүд босхҗ күүндсн деерән дааврта кергт орлцҗ олнд үлгүр болх кергтә болв. «Күүкд улс өөрән бәәдг әмтнә тускар ухалҗ, килмҗән тусхахар шунна, зуг бийиннь тускар зәрмдән мартна. Тегәд күүкд улс эврәннь эрүл-мендин тускар ухалҗ, җил болһн эмчд орх зөвтә», – гиҗ депутат тоолҗана.
Таңһчин Улсин Хуралын депутатнр эрүл-мендин бәәдл шинҗллһнә кергт орлцв. Эднә үлгүрәр таңһчин Улсин Хуралын көдләчнр бас эмчнрин хәләврт орхар шиидв. Одахн Элст балһсна поликлиникин эмчнр Хальмг Таңһчин Толһачин болн Элст балһсна һардврин көдләчнрин төлә «Эрүл-мендин өдр» гидг керг-үүлдвр бүрдәв. Ут тоодан 116 күн олн зүсн гемәс хөрлһнә шинҗллт кехин төлә цусан өгв, флюорографь, маммографь, ЭКГ кев. Балһсна поликлиник эн керг-үүлдвр давулҗ, күч-көлсч бүрдәцд одад, дор ормднь көдләчнрин эрүл-менд шинҗлхдән белн бәәнә.
Хальмг Таңһчин Толһач Хаска Батун седвәрәр «Эрүл-менд бәәтн!» гидг керг-үүлдвр хойр җил дарандан болҗана. Терүнә йовудт эмчнр таңһчин хол селәдт күрч, бәәрн улсин эрүл-менд шинҗлҗ, эмнлһнә туст сүв-селвг өгнә. Эмчнр хамгин түрүнд медәтнрин, эрмдгтә улсин болн СВО-д орлцачнрин эрүл-менд харлһнд ик оньг тусхана. Эн зунар эн керг-үүлдврин һурвдгч девсң болв, терүнә йовудт 2500 күн эрүл-мендин бәәдлән шинҗлв. Эмчнрт бийән үзүлсн улсас 126 күн гемтә болҗ һарв. 45 күн тер дарунь П.Жемчуевин нертә таңһчин эмнлһнд орулгдв.
Күн болһн эврәннь эрүл-мендин тускар ухалад, шаңһа көтлврин йовудт өңгәр эмчнрт бийән үзүлх зөвтә. Цаглань ямр нег гем илдкҗ, кергтә эмнлһ авч, спортар соньмсад, эрүл-менд бәәхлә, җирһлин таал чигн ясрхнь лавта. Таңһчин Улсин Хуралын депутатнрин седвәриг әмтн дөңнәд, эднә үлгүрәр бас эрүл-мендин бәәдлин туст дааврта болтха.

ДООҖАН Наталья
ЗУРГТ: балһсна поликлиникин көдләчнр
таңһчин залврт «Эрүл-мендин өдр»
керг-үүлдвр бүрдәсн кем