Ниитәһәр бәәхин төлә

Урҗ өдр Элстд олн улсин ниицлтин Өдр өргнәр темдглв. Әрәсән шин тууҗд эн сән өдр 2005 җилд батлгдад, эн җилд дигтә хөрдгч кемдән темдглгдсн болдг. Тер өдр өрүн «Әрәсән улсин Ассамблей» олна бүрдәцин седвәрәр мана таңһчд үүлддг сойлын болн келн-улсин әңгүдин элчнр ирлцңгү ке-сәәхн хувцан өмсәд, «Мөңк һал» бумблвд цецгүд тәвәд, өдгә цагт бидн цуһар эвин таалд ниитәһәр бәәлһнә төлә әмән өгсн улсин ач-тусинь хәрүлв.
– Олн улсин ниицлтин Өдр мана орн-нутгт бәәдг олн келн-улсин төлә хамгин чинртә болн темдгтә байр болдг. Тер юңгад гихлә Әрәсәд 200 шаху келн-улс хоорндан ахнр-дүүнр мет ниитәһәр бәәнә. Тегәд бидн цааранднь өвкнрин заясн авг-бәрцәр бәәх зөвтәвидн, – гиҗ «Әрәсән улсин Ассамблей» олна бүрдәцин хальмг әңгин һардач Бембин Евгений темдглв.
Үдин хөөн Элст балһсна Диилврин паркд байрин концерт болв. Олна нәәрин йовудт мана таңһчд үүлддг келн-улсин болн сойлын әңгүдин элчнр нег һазра улсан йөрәв. Тер мет СВО-н ветеран, Элст балһсна хургин депутат Чумуда Николай бас тәәз деер һарад олна йөрәлин үгд багтв.
– Бидн цуһар төрскн һазр-усндан эңкр улс болнавидн. Өдгә цагт нег һазра мана дәәчнр Әрәсән олн келн-улсин элчнрлә хамдан цергә шишлң керг-үүлдврт орлцад, әмән әрвллго Төрскән харсчана. Тедн хоорндан йилһл уга ахнр-дүүнр мет олна кергән күцәҗәнә, – гиҗ Николай Санджи-Горяевич келв.
Олна ниицлтин Өдрт нерәдсн концертд таңһчин болн Элстин сойлын үүдәгч коллективс олн-әмтнд билг-эрдмән нерәдв. «Дәәч» цергә-спортын төвин дамшачнр бу-селмин һәәхүл бүрдәв. Һаза серүн болсн бийнь әмтн олар ирв. Байрт ирсн гиичнр улан зандн хальмг цәәһәр болн боорцгар тоогдад, цаган сергмҗтәһәр давулв.

ОЛЬДАН Цаһан