Ах үйнрин санлд

Баһ Дөрвд селәнд Сиврин тууврт тусад, цааҗллһна күнд тоотыг дааҗ һарад, төрскн һазртан ирәд, таңһчан босхч авсн ах үйнрин санлд нерәдәд, бумблв босхгдв.

Күчр-күнд даргдлго, тууҗан, сойлан, авъясмудан геелго, үрдән өскәд, нерән хадһлад ирсн өвкнртән ханлтан медүлҗ, санлынь тевчсн бумб Баһ Дөрвдт босхгдснь ик чинртә йовдл мөн. Өвкнрин санлыг тевчлго үйнрин залһлдаг батлҗ болшго.
Хальмгудын тууҗд учрсн һашута цагиг мартулшго эн төсвиг күцәлһнә седвәриг бәәрн һазрин күн Эрднин Бурлака Ефим татсн болдг.
«Санлын керг-үүлдвр күцәлһн йириндән седклин үүмәтә болсн деерән өвкнртән мадн күндллһән медүлҗәдг йовдл болҗана, - гиҗ Баһ Дөрвдә района толһач Джекин Баатр келв. - Хальмгуд тууврт бәәсн һашута цагиг эндр тодлҗанавидн. Төрскн һазрасн салһгдсн, гер-мал уга үлдсн бийнь хальмгуд тууҗан, сойлан, ухани зөөрән мартлго хадһлад, үнн юмн үнндән һарад, төрскн теегүрн хәрҗ ирәд таңһчан босхч авсмн. Цуг эднә санлд эндр эн бумблв секчәнәвидн. Ик буйнта кергин седвәрч Эрднин Ефимд ханлтан медүлҗ, бумблв секвидн. Күнд тер цагиг мартхмн биш. Өвкнрин санлыг тевчҗ йовхмн!»
ҖИРҺЛИН Кермн