Медәтнрин түрүн нөкд

Көтчнрә района Тугтн селәнд өсәд-боссн Мөңкән Валентина сүл хөрн һар җилин туршарт социальн көдләч болҗ көдләд, һанцарн бәәдг медәтнрин болн гемтә-шалтгта улсин түрүн нөкд болҗ дөң-тусан күргҗәнә. Энүнә килмҗтә хәләврт ода тавн күн бәәнә. Валентина Басанговна күн болһнд цаһан седклән нерәдҗ, медәтнрин сурсиг-даалһсиг күцәҗ, эднд нүдн-амн болна.
Социальн көдләчин хәләврт бәәдг медәтнр Бося Бамбышевна Чиряева, Ирина Батнасуновна Бельтрикова, Екатерина Мутуловна Бакурова, Арслан Аршанович Манджиев болн Леонид Борисович Менкенов Валентина бер орҗ ирхиг күләнә. Кергтә эминь, хот-хоолынь хулдҗ авад, геринь ахулад, хотынь болһад, ус орулад, нань чигн көдлмш күцәһәд, медәтнрлә ю-бис күүндәд, Валентина Басанговна цугтаднь оньг тусхахар шунна. Көтчнр селәнүр эврәннь кергәрн һарч йовхларн, эднд юн кергтәһинь соньмсад, тендәс сурсинь авч ирнә. Селәнд үүлддг эмнлһнә көдләчнр Бадмин Светлана болн Моңһла Софья социальн көдләчлә бат залһлда бәрҗ, медәтнрт ямр нег дөң кергтә болхла, дарунь ирнә. Җил болһн медәтнр эрүл-менд шинҗллһнә керг-үүлдврт орлцна, района эмнлһнәс ирсн мергҗлтнрин сүв-селвг авна. Эрүл-менд харлһна көдләчнр медәтнрт гертнь дөңгән күргнә.
- Бидн мана хәләврт бәәдг медәтнрлә олн зүсн төрәр күүндвр тогтаҗ, мек-тах һарһдг улсас харсч ямр нег буру йовдлас саглуллһна тускар келҗ өгнәвидн. Дәкәд түүмрәс саглҗ, әәмшг уга бәәдлин болн нань чигн төрәр күүнднәвидн. Медәтнрлә хамдан цогц-махмуд батруллһна кичәл давулҗ, көл-һаран тинилһҗ даалһврмуд күцәнәвидн. Селәнә дунд сурһулин бичкдүд мана медәтнриг оньгасн алдхш, сән өдрмүдт белгән авч ирҗ йөрәнә. Сурһульчнр һанцарн бәәдг болн эрмдгтә улсин герин һаза хавртнь-намртнь сән кец-таал тогтаҗ, хог-бог ахулҗ, үвлднь болхла цас хураҗ маднд нөкд болна. Иим харһлтс баһ болн ах үйин залһлда батрулна, медәтнр тодлврмудан сергәҗ, җирһлиннь дамшлтарн хувалцҗ сурһульчнрт сүв-селвгән өгнә, - гиҗ Валентина Басанговна келнә.
Мөңкән Валентина Бося Бамбышевнан, Ирина Батнасуновнан, Екатерина Мутуловнан социальн көдләч болҗ арвн һар җилдән көдлҗәнә. Далн-найн нас һарсн ээҗнр эн җилмүдин эргцд энүнд өөрхн элгн-садн улс мет болв. Бося Бамбышевна Хальмг Таңһчин ачта багш, эн сурһуль-эрдмин халхд олн җилдән көдлҗ йовсмн. Найн тавта медәт шүлгүд чееҗәр айслулҗ умшна, бичкдүд гиичд ирхлә эн баһ цаган тодлҗ, хамдан көдлҗ йовсн үүрмүдиннь болн сурһульчнриннь тускар эднд келҗ өгнә. Сул цагтан медәт үүрмг сувсар ке-сәәхн зургуд хатхна. Бийнь Валентина Басанговна бас үүл бәрхдән дурта, эн олн зүсн хувц уйҗ-өлгҗ цаган тустаһар давулна.
Социальн көдләчд кех-күцәх көдлмш баһ биш болсн бийнь Мөңкән Валентина олна кергт бас шунмһаһар орлцҗ, селәндән седвәртә, шунлтта күүкд күн болна. Олн үртә эк селәнә күүкд улсин ниицәнә ахлач болҗ үүлдҗәнә. Эдн цергә керг-үүлдврт орлцҗадг нег һазра улст буйнч седкләсн нөкд болҗ, хот-хол цуглулна, бу-селм бүркдг гөлм өлгҗ йовулна. Көдлмшән үнн-чик седклтәһәр күцәдг күүкд күн олна нүүрт йовҗ, өрк-бүлдән килмҗән тусхаҗ, герин чимг болна. Эдуард Хартылович авальтаһан хамдан һучн җилдән ниитә бәәнә, һурвн үрндән чик сурһмҗ өгв. Аав-ээҗ хойр ач-зеедән цань уга эңкр болна. Селән һазрт өсәд-боссн төләдән эдн мал бәрҗ, эврә үстә, тоста, махта бәәнә.
Тугтн селәнд хойр социальн көдләч бәәнә. Улян Булһн бас олн җилдән медәтнрт нөкд болҗ Валентина Басанговнала хамдан ниитәһәр көдлҗәнә. Эдн нег-негндән дөң күргҗ, ямр нег төр учрхла, хамдан арһ-чидләрн терүг хаһлна. Көтчнрә района әмтнә социальн теткврин төвин һардач Мацга Татьянан темдглсәр, Тугтна медәтнр цаһан саната, өр-өвч седклтә улсин хәләврт бәәнә. Медәтнр эднә тускар буульмҗтаһар келҗ, көдлмшинь өөдәнәр үнлнә.
ДООҖАН Наталья
ЗУРГТ: Мөңкән Валентина
(зүн бийәснь хойрдгчнь) Тугтна күүкд улсла гөлм өлгҗәнә