Төрскән харсачнрин төрмүдәр күүндв

Шидр Хальмг Таңһчин залврин Ахлачин дарук – Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Марина «Төрскән харсачнр» саңгин әңгин төрмүдәр үүлддг бүрдәцд хоорндк әңгин дарани сүүр давулв.

- Цергә шишлң керг-үүлдврт орлцачнриг дөңнлһнә керг эркн чинртә болна, тегәд теднә эрлһсиг дарунь хәләһәд, талдан бүрдәцсин дөң-тусар төрмүдинь хаһлх кергтә. СВО-д орлцач болһнд болн терүнә өрк-бүлин гешүдт оньган тусхаҗ, килмҗән өгч үүмүлҗәдг төртнь орлцҗ дөң күргхмн. Ветеранмудас орҗ ирсн эрлһсиг шинҗләд, хамгин чинртә төрмүдиг диглҗ авхмн. Шаңһа бүрдәцс хамцу үүлдҗ, көдлмшән хамдан күцәх зөвтә, – гиҗ Марина Петровна келв.
Комиссин гешүд «Төрскән харсачнр» саңгин таңһчд үүлддг әңгин хайгар орҗ ирсн эрлһсиг хәләһәд, ветеранмудыг соньмсулҗадг төрмүд йосна бүрдәцс хамдан хаһлҗ дөң күргсиг темдглв. Тиигәд, Элст балһсна һардвр цергә шишлң керг-үүлдврт орлцачнрин зургуд барлхмн, СВО-д орлцачнрин күүкд бичкдүдин амрлһна лагерьмүдт одхмн, санаторьт одад эрүл-мендән батрулхмн гиҗ зәңглгдв. Хальмг Таңһчин эрүл-менд харлһна министерств цергә керг-үүлдврт орлцачнриг орн-нутгин эмнлһнә төвд күрглһнә төр хаһлгдв.
Таңһчин залврин Ахлачин дарукин даалһврар «Төрскән харсачнр» саңгин әңг болн таңһчин цергә комиссариат нөкцлтин бооца батлхмн гиҗ зуралгдҗана. Саңгин таңһчд үүлддг әңгин көдләчнр цергә комиссариатла хамцу үүлднә, болв нөкцлтин бооцан эднә көдлмш шунмһадулҗ батрулхд туслхнь лавта. Тер мет таңһчд үүлддг саң хальмг Таңһчин юристнрин Ассоциацла, күүнә зөв харсдг элчин аппаратла, таңһчин министерствсла хамдан өңгәр юридическ дөң күргхин төлә райодар һарч йовхмн.
Цергә керг-үүлдврт орлцачнрин болн теднә өрк-бүлмүдин гешүдин төрмүдиг дарунь хаһлҗ дөң күргхин төлә райодын муниципальн бүрдәцсин толһачнрт ветеранмудас орҗ ирдг эрлһиг шинҗлҗ дигтә-дарата көдлмш бүрдәх неквр тәвгдв.

БАТАН Сәәхлә