Мергҗлтнриг белдхин төлә

Эн өдрмүдт Әрәсән бәәрн залвриг делгрүллһнә бүрдәцин (ВАРМСУ) «Матрица роста» гидг сурһулин ик хург болв. Эн керг-үүлдвриг Хальмг Таңһчин Толһачин һардвр болн таңһчин муниципальн бүрдәцсин хүүвин негдлт бүрдәҗ давулв. Сурһулин көтлврт 13 района болн Элст балһсна элчнр орлцад, һурвн өдрин туршарт мергҗлтән өөдлүлҗ, кеҗ-күцәҗәдг көдлмшиннь тускар хоорндан хувалцҗ, шаңһа төсвст орлцлһна туст дамшлт хоршав.

Хургт орлцачнриг Хальмг Таңһчин Толһачин һардврин ахлач Кирилл Попов болн таңһчин муниципальн бүрдәцсин хүүвин негдлтин ахлач, Октябрьск РМО-н толһач Увшан Басң йөрәһәд, сурһулин көтлвр кен-негнднь олзта- туста болхиг дурдв. «Селәдин, балһсдын болн райодын муниципальн бүрдәцс бәәрн улсла бат залһлда бәрҗ, эднә төрмүдт орлцҗ, эднә керг-төриг цугтаһаснь сәәнәр меднә. Тегәд тана көдлмш улм күцәмҗтә болхин төлә иим керг-үүлдврмүд эрк биш кергтә. Мана таңһчд кегдсн шинҗллтсин ашт әмтн ямр нег төр учрхла хамгин түрүнд тадн тал ирдгиг медүлв. Әмтн бәәрн залврин бүрдәцст иткҗ, тадн дөң болхд гиҗ нәәлдг болснь байрта. Эндр мана орн-нутгт эркн чинртә төрмүд баһ биш бәәнә, тегәд бидн арһ-чидлән хамцулҗ, нөкцҗ үүлдҗ, нег һазра улсин җирһлин таал ясрулхин төлә көдлмшән улм шунмһадулҗ үүлдх зөвтәвидн», - гиҗ Кирилл Попов темдглв.
Эндр мана таңһчд бәәтхә, цуг орн-нутгт мергҗлтнриг белдлһнә болн муниципальн бүрдәцст бас кадрмудын төр нәрн болҗана. Тегәд бүрдәц болһнд кадрмуд белдлһнә шишлң көтлвр белдҗ, көдләчнрт сән таал тогталһна, урмдуллһна төрмүд хаһлх кергтә гиҗ хургт келгдв. Муниципальн бүрдәцсин элчнр эн төрәр ухан-тоолврарн хувалцҗ, баһчуд селән һазрт бәәһәд көдлхин төлә хамгин түрүнд сән таал тогтаҗ, җалвинь икдүлх кергтә гив.
- Мана орн-нутгт, тер тоод таңһчд, муниципальн йосна чинр өөдлүллһнд ик оньг өггдҗәнә. Тиигәд, Әрәсән Президентин даалһврар муниципальн бүрдәцсин нүүрләчнрин сурһуль давулгдҗана, зәңгллһнә шишлң эв-арһ тогтагдв. Эн керг-үүлдвриг бидн Хальмг Таңһчин Толһач Хаска Батун даалһврар хойрдад давулҗанавидн. Район болһнас һурваһад болн хотл балһснас зурһан күн орлцҗана. Бидн селәдин, райодын болн балһсдын сән гисн мергҗлтнриг цуглулад, көдлмштнь омг өгхин төлә эн сурһулин көтлврин йовудт шин медрл зааҗ өгчәнәвидн. Эдн цуһар иргнмүдиг үүмүлҗәдг төрмүдиг хаһлҗ, олн зүсн төрәр цәәлһвр өгч, күн болһнд дөң-тусан күргҗ үүлддг улс мөн. Эн һурвн өдрин туршарт муниципальн йосна бүрдәцсин элчнр мергҗлтән өөдлүлҗ, хоорндан таньлдҗ, дамшлтарн хувалцҗ, шин медрл хоршаҗ авхмн Сурһулин көтлврт орлцачнр дааврта һардачнрла харһҗ күүндсн деерән цаган сергмҗтәһәр давулҗ цогц-махмудан батрулҗ эв-дован бас үзүлхмн. Эн өдрмүд эднд туста болх гиҗ иткҗәнәвидн, - гиҗ Увшан Басң келв.
Сурһулин көтлврт орлцачнрин төлә һурвн өдрин туршарт олн зүсн керг-үүлдвр болв, марһас болн харһлтс бүрдәгдв. Тиигәд, Хальмг Таңһчин Улсин Хуралын (Парламентин) Ахлачин дарук Нуура Николай, ЦУР-ин һардач Бадан Бадм, таңһчин тосхлтын, селәнә эдл-ахун, жилищн-коммунальн, йиртмҗин көрңгин министрмүд Киштә Мелентьева, Һаван Тимур, Константин Климентьев болн Һооҗура Санл эднлә харһад, шин закадын, шаңһа төсвсин болн көтлврмүдин тускар келәд, бәәсн һазриннь делгрлтин төлә терүнд орлцхин төлә бәрмт цаасд белдлһнә, эрлһән орулҗ өглһнә туст сүв-селвг өгв. «Матрица роста» гидг сурһулин көтлврт орлцачнрт мергҗлт Евгения Черкасова лекцс умшҗ, ик хургт үг келҗ, бийән чикәр бәрлһнә, ухан-тоолврарн хувалцҗ олна күүндврт орлцхин туст селвглв. Зәрмнь эврәннь күцәмҗин тускар келхдән эмәнә, зуг кесн көдлмшиннь тускар медүлҗ, олнд седвәрән болн шунлтан үзүлх кергтә гиҗ эн келәд, көтлврт орлцачнрла олн зүсн төрәр күүндҗ керг-төрин наадд давулв.
Һурвн өдртән сурһулин көтлврт орлцачнр «төгрг ширән» сүүрт, харһлтст орлцад, хоршасн медрлән олзлҗ олн төрәр даалһврмуд күцәв. Өдгә цага некврлә ирлцҗ даавртаһар көдлхин туст шин эв-арһсла таньлдад, медрлән гүүдүлҗ сурһуль сурсна хөөн эднд иткл цаасн бәрүлҗ өггдв.

ДООҖАН Наталья