Хальмгин приставмудыг ачлв

Шидр Әрәсән зарһин приставмудын цергллтин 160 җилин өөнд нерәдгдсн байрин хург болв. Хальмг Таңһчин Толһач Хаска Бату, таңһчд ах федеральн инспектор Александр Беляев, Хальмг Таңһчин Улсин Хуралын (Парламентин) Ахлач Артем Михайлов, Хальмг Таңһчин залврин Ахлач Босхмҗин Гилән, зөв-йос харлһна цергллтсин болн зарһин бүрдәцсин һардачнр терүнд орлцв.

Байрин хургин эклцәр Хальмг Таңһчин Толһач Хаска Бату нарт-делкән чемпион, эцк Серафим мана таңһчур ирәд, энд Алдр Диилврин 80 җилин өөнд, Әрәсән олн келн-улсин иньгллтд нерәдҗ ик күцәмҗтә йовдл учрасиг зәңглв. Күндтә гиич нарт-делкәд үнлгдх залу-зөрмгән иткүлв гиҗ Бату Сергеевич бахтҗ келв. «Эн җил мана орн-нутгт Төрскән харсачин җил болҗана, би эврәннь күцәмҗән цуг мана харсачнрт нерәдҗәнәв. Мини аавнр Төрскән харсч зөрмг кевәр дәәлдҗ йовла. Бидн дорас өсч йовдг бичкдүдт үлгүр үзүлҗ, эднд төрскнч сурһмҗ өгх зөвтәвидн», - гиҗ эцк Серафим келв.
Дарунь Әрәсән зарһин приставмудын цергллтин Хальмг Таңһчар үүлддг заллтын һардач Роман Мухортов хамдан көдлҗәдг үүрмүдән, ветеранмудыг сән Өдрлә йөрәв. Цергллтин көдләчнр ялын, бичкдүдиг асрлһна болн нань чигн халхар мөңгиг цаглань эс өгсн улсин туст күцәгч кергүд бүтәһәд, таңһчин оруһин әңг икдүллһнд тәвцән орулҗ даавртаһар көдлҗәхиг һардач темдглв. Тиигәд, эн җил эдн таңһчин хазнд 60 сай арслң орулв, арвн сарин эргцд 127 миңһн керг күцәһәд, 1 сай 300 миңһн арслң некч авв. Үрән асрлһнд мөңгән цаглань эс өгсн 150 иргн 154 сай арслңга өрән даңцав. Зарһин приставмуд цергә шишлң керг-үүлдврт орлцҗадг дәәчнриг дөңнәд, эн җил эврә сән дурар 1 сай арслңга дем өгв, ода 9 мергҗлт шин регионмудт церглҗәнә.
Хальмг Таңһчин Толһач Хаска Бату таңһчд үүлддг ФССП-н заллтын һардач Роман Мухортовин тускар буульмҗта үг келҗ, цергә керг-үүлдврт орлцсиг, ода региональн заллтыг чадмг кевәр һардҗахиг онц темдглв. «Мана таңһчин делгрлтд болн орн-нутгиг батруллһнд хамдан көдлх хөв учрснд бахтнав. Зарһин приставмудын цергллт зөв-йосна бәәдл батруллһнд ик тәвцән орулҗана. Тана дөңгәр таңһчин хазна оруһин әңгд мөңгн орна, тернь социальн төрмүд хаһллһнд олзлгдна. Тана цергллт мана таңһчд үүлддг орн-нутгин талдан бүрдәцслә хамдан нөкцҗ үүлдҗ, йос харлһна, әмтнә зөв харслһна кергт туслна. Тадн цааранднь чигн эврәннь кергән даавртаһар күцәҗ көдлхит гиҗ ицҗәнәв. Көдлмштн күцәмҗтә болтха», - гиҗ Бату Сергеевич йөрәлин үгдән темдглв.
Сән авъяст тохрсар байрин хургт олн җилдән үнн-чик седклтәһәр көдлҗәдг мергҗлтнр Хальмг Таңһчин Толһачин болн таңһчин залврин Ханлтын бичгүдәр, Күндллһнә һашгудар, Әрәсән зарһин приставмудын цергллтин медальмүдәр ачлгдв. Таңһчин билгтнр зарһин приставмудыг байрлань бас йөрәҗ, ду-бииһән нерәдв.
БАТАН Сәәхлә