Шугран Вераг ончта өөнләнь йөрәв

Шидр хальмг улсин шүлгч, бичәч, седкүлч, орчулач, драматург, Хальмг АССР-ин сойлын ачта көдләч, Советин Союзин Баатр Делгә Эрднин нертә Хальмгин комсомолын болн «Улан Зала» мөрәсин лауреат, Хальмг Таңһчин частрин түүрвәч Шугран Вера ончта өөнән темдглв.

Вера Киргуевнаг мана таңһчд ик-бичкн уга цуһар меднә. Дорас өсч йовдг үйнр бичкдүдин садас авн дунд сурһульд сурдг көвүд-күүкд чигн энүнә үүдәлтлә өөрхнәр таньлдна. Одахн таңһчин Толһач Хаска Бату нертә үүлдәч тал золһҗ одад, һарсн өдрләнь йөрәв.
– Шугран Вера нег һазра улсин төлә бахмҗ болдг. Өсч-боссн һазр-усан, тууҗан, сойлан болн төрскн келән яһҗ хадһлхиг энүнә үүдәврмүд олнд медүлҗәнә. Тер мет Вера Киргуевна Хальмг Таңһчин түүрвәч болна, энүнә нернь мана тууҗд болн сойлд алтн үзгүдәр бичгдҗ орв, гиҗ темдглх кергтә. Терүнәс нань нег һазра күүкд улсин дунд эн «Хальмгин күч-көлснә Баатрин» нериг түрүлҗ зүүсн болдг. Ончта өөнләнь йөрәһәд, Әрәсән бичәчнрин ниицәнә «Утх-зокъялд ач-тусан күргсн төлә» нертә ачлвринь бәрүлҗ өгүв. Уул хальмг келән сәәнәр меддг, цецн булгин болн билгин йоста темдг болҗадг Вера Киргуевнас бидн цуһар үлгүр авх зөвтәвидн. Мана таңһчин сойлд ик тәвцән орулҗадг эн үүлдәчд эрүл-менд болн цаһан хаалһ дурдҗанав, гиҗ Бату Сергеевич йөрәҗ темдглв.

ОЛЬДАН Цаһан