Төрскән харсачин туск фильм

Сочи балһснд үкр сарин 10-д дарани нарт-делкән кинонаадм көдлмшән эклв. В. Меньшовин нер зүүҗәдг эн наадм 20-ч кемдән кегдҗәнә.

Төрскән харсачин җилд нерәдгдәд, «Победили вместе» гидг дуудвртаһар тер давҗана. Энүг байрин бәәдлд секлһнд «Защитники России. Калмыкия» гидг фильм белдсн баг болн фильмин һол дүр болсн Тимур Занкидаров ачлгдв.
«Защитники России» гидг ик төсв олн серийәс тогтҗана. ДНР-ин Толһачин селвгч Игорь Кимаковскийин седвәрәр эн төсв күцәгдҗәнә. Төрскән харсачин җиллә ирлцүлҗ төсв бәәдл-җирһлд тохрагдҗана.
Чинртә эн төсвин түрүн серий Хальмгт нерәгдснь соньн гих кергтә. Фильм эн җилин туула сард Хальмг Таңһчд цокгдҗ авгдсмн. Цергә шишлң керг-үүлдврин ветеран, ода болхла Элст балһсна 17-ч тойгта дунд сурһулин багш Тимур Занкидаров фильмин һол дүрнь болв.
Цергә даалһвран күцәҗ йовад, Тимур болн энүнә танкин экипаж СВО-н түрүн өдрмүдәс авн зөргтә кевәр хооран цухрлго дәәлдсмн.
Зөргтә танкист өдгә цагт сурһуль-эрдмин халхар көдләд, Элст балһсна 17-ч тойгта дунд сурһулин багш болҗана. Баатрин төрскн һазриг үзүлхләрн таңһчин болн хотл балһсна ке-сәәхн тоотыг фильмиг бүрдәһәчнр сән кевәр медүлв. Иим сәәхн һазрт бәәх, байн тууҗта, өвәрц сойлта, улсин һольшг авъясмудта һазрин күчн төрскән харсачнрин заңгинь батрхд, өссн-боссн һазран харсхдан белн баатрмудыг өскхд туслдг тоотыг чигн фильмиг бүрдәһәчнр олн хәләһәчнрт медүлҗ чадв. Хальмгин һазрт өсч боссн баатрин туск фильм олн хәләһәчнрин оньгиг авлхнь маһд уга.
Фильмиг режиссер Богдан Шимохин белдҗ тәвв. Бичәч эн күн цагтан С. Герасимовин нертә кинематографин Цугсоюзн ик сурһуль төгсәсмн. Иигәд режиссер болн бичәч Богдан Шимохин хальмг баатрин зөрмг үүлдврәр соньмсад, фильм цокҗ авв. Хальмгт фильмиг белдлһнд таңһчин сойлын болн зуульчллһна министерств болн «Калмыкия» таңһчин зәңгллһнә агентств дөңгән күргсмн.
УШКАНА Сувсн