Келн-улсин негдлтиг батлхар

Улсин негдлтин өдрлә соньн нег керг-үүлдвр эклв. Мөр унҗ хаалһд һарч йовх седвәриг Дагестанд татсмн.
Дагестана ногайцнрин медәтнрин хүүв болн мөрчнрин спортын клуб мөр унҗ йовлһ кехәр шиидсмн. Эднә шиидвриг Дагестана залвр дөңнв. Дагестана, Хальмгин болн Әәдрхнә мүҗин һазрар мөрд унҗ эдн зуульчлҗ йовна. Хоша бәәдг олн келн-улсин бат иньгллтиг дәкн нег үзүлх күслтәһәр эн йовлһн бүрдәгдв. Хаалһнь нәәмн хонгтан болхмн гиҗ зуралгдсмн.
Хаалһдан һурвн хонгтан йовад, Хальмгин Лаганя районд мөрчнр ирв. Улан Хол селәнд эн керг-үүлдврт орлцачнриг ик байртаһар тосч авв. Хоша бәәдг һазрас мөр унҗ ирсн әмтиг бәәрн улс тосч гиичлүлв.
Ирсн гиичнр ах-дүүһин залһлдаһан батлхар, нег ик орн-нутгт цугтан ни-негн эвәр бәәхиг теткх күслән медүлв. Эндрк өдрин тускар, иргч зурасин тускар тохнята күүндвр болв.
Йоста негдлт хоосн үгәр биш, хамцу кергүдәр, нөкцҗ үүлдлһәр тогтдгин тускар тодрхаһар келгдв. Кен-негнәннь авъясмуд күндлҗ, хоорндан залһлда бәрҗ үүлдлһн йириндән келн-улс хоорндк нөкцлтин улнь болдмн. Лаганя района һардвр соньн эн керг-үүлдврт орлцачнрт цаһан хаалһ дурдв.
Хальмгин хөөн мөр унсн седвәрчнр Әәдрхнә мүҗин һазрар йовад, герүрн хәрҗ ирв.