Көгҗмин альбом белглв

Москвад үкр сарин 5-д Кремльд Әрәсән Президент Владимир Путин келн-улс хоорндк хәрлцәнә төрәр үүлдҗәдг Хүүвин гешүдлә харһв. Эн харһлтын йовудт «Межэтническ журналистикин Гильдин» президент Маргарита Лянге орн-нутгин Толһачд «Звук Евразии» гидг нертә винилов альбом бәрүлҗ өгв.

Терүнд Хальмгин «HAGRIN», («Хагрин») багин винилов хойр пластинк орсн бәәнә. Әрәсән келн-улсин олн дун орсн тер альбомд хальмг «HAGRIN» этно-электропанк-багин «Полынь» гидг үүдәвр, тер мет «ШЫП ЛИЙ» гидг марийск дуучнрла хамдан белдсн «Воины леса и степи» гидг дун орсмн.
Альбомд орсн тоот өдгә цага көгҗмин олн зүсн янзиг үзүлҗәнә. Әрәсән регион болһнд көгҗм олн халхар делгрт авчахинь альбом йир сәәнәр медүлҗәнә. Көгҗмин эн хураңһуд хальмг электропанк орс хип-хопла, марийск рэпла, эвенкийск этно-трансла, пермск неофолкла ниицҗ, хамдан көгҗмин нег зергләнд йовна. Көгҗмин иим олн зүсн делкәлә таньлдх арһ президентд учрҗана. Орн-нутгин Толһач көгҗмин иим өвәрц соньн айсмудын дүүрәнд багтх таалта болв.
Маргарита Лянген темдглсәр, эн «Звук Евразии» гидг төсвиг сойлын седвәрмүдин Саң дөңнсмн. Альбомиг белдлһнә көдлмш һурвн җилдән кегдсмн. Иигәд 2022 җиләс нааран җил болһн Әрәсән келн-улсин авъяс болсн көгҗмин ул деер үүдәгдсн үүдәврмүд пластинк болҗ белдгдҗәнә.
Владимир Путин ханлтан медүләд, ик чинртә көдлмш кегдсинь темдглв. Хальмг Таңһчин Толһач Хаска Бату эн йовдлын туск тоолвран бас медүлв. «Межэтническ журналистикин Гильдин» президент Маргарита Лянгед ханлтан медүлҗәнәв, - гиҗ Бату Сергеевич темдглв. - Әрәсән келн-улсин көгҗм болн дун нег ик хураңһуд орснь ик чинртә. Үүдәгч үүлдвр әмтиг хамцулна. Эннь бахмҗта йовдл!».
«HAGRIN» багин орлцачнр эн зәңгиг ик байртаһар тосв. Эднә көгҗмин үүдәврмүд Президентин оньгт тусхагдснь эднд ик урмд өгчәнә.
Әрәсән олн келн-улсин көгҗм болн дууна эрдм йир өвәрц болн һазр болһна ончарн соньн болдгиг эн альбом медүлҗәнә.
УШКАНА Сувсн