Өнр-өсклң Омакаевихн

Өдгә цагт мана таңһчд олн үртә өрк-бүлмүдин то өсәд йовна. Тиим бүлмүдт өссн көвүд-күүкд нег-негән хәләҗ, дөңнҗ, хоорндан ниитәһәр бәәдг. Кезәнәс авн мана аавнр-ээҗнр арвн болн энүнәс үлү үр һарһад өскдг билә. Эндр болхла өвкнрин үлгүрәр баахн эк-эцкнр бас олн үртә болхар седҗәхнь бахмҗта.

Көтчнрә района Сарпа селәнд бәәдг Омакаевихнә бүлд тавн үрн өсчәнә. Арвиг Леонидович Эльвира Анатольевна авальтаһан хамдан һурвн көвүндән болн хойр күүкндән сән сурһмҗ өгхәр зүткчәнә. Эдн нег-негән бичкнәсн авн меднә, тер юңгад гихлә Сарпан селәнә нег уульнцд өсәд-боссмн. Төрскн селәндән дунд сурһулян төгсәһәд, Омакан Арвиг Элстин технолого-экономикин колледжд орв, Утнасна Эльвира болхла Санкт-Петербург балһснд тоочин сурһульд орҗ сурв. 2011 җилд баһчуд өрк-бүлән өндәлһв. Тер җилд ууһн үрн Андрей һарад, зееһән аав-ээҗнь хәләһәд нөкд болв. Баахн өрк-бүл цаг зуур Москвад көдләд, хөөннь төрскн Сарпа селәндән ирҗ бәәршлв.
Келхәс, Арвигин аавнь Бембә Убушиевич нертә малч бәәсмн. Терүнә үлгүрәр ачнь бас мал өскхәр шиидв. Омакан Арвиг «Сарпа» АО-д экләд көдлв. Мал өскнә гисн амр керг биш, зуг бичкнәсн авн ааван дахад, цугинь хәләдг билә. Цол бәәхлә Элстд бәәдг Леонид Бембеевич эцкнь ирәд, көвүндән бас нөкд болна. Шаңһа мал өсксн деерән эврә мөрдән, хөөдән болн бод малан бас арднь орад хәләнә. Удл уга үвлзлһнә кем эклхмн. Энүг һару угаһар давулхин төлә баахн малч теҗәлән эртәснь белдҗәнә. Хаша-хаацан ясад, үвлд дааврта кевәр белдврин көдлмшән күцәҗ йовна.
Эндр Омакаевихн тавн үрән төрскнч седклтә, тевчңгү улс болтха гиҗ хальмг авг-бәрцәр өскчәнә. Ууһн Андрей шатрар соньмсад, олн зүсн марһаст орлцна. Анна Алина хойр күүкнь сурһулян сәәнәр сурад, дунд сурһулин ул деер үүлддг театрт орна. Хойр җил дарандан эдн «Нарна толян» нертә таңһчин наадмд орлцҗана. Очр болн Сарул хойр бичкдүдин садт орна. Ахнр дүүнрән хәләһәд, эк-эцкдән даңгин нөкд болна.
Герин эзн Омакан Арвигин келсәр, олн үртә эк-эцк хөвтә болдг. Эдндән сурһуль болн чик сурһмҗ өгхлә, өсәд-босад, эрк биш нег-негән хәләһәд, дөң-тусан күргхнь лавта. Күн болһна җирһлд өрк-бүл онц орман эзлнә. Мел өрк-бүләс цугнь эклдг. Хамгин үнтәнь эк-эцк, аав-ээҗ, өөрхн элгн-садн мөн. Өрк-бүл гисн хамгин үнтә тоот болна, гиҗ эн темдглв.
Эндр Хальмг Таңһчд үртә өрк-бүлмүдиг дөңндг олн зүсн эв-арһ бәәнә. ЖКХ-н һарун мөңгиг даңцана, тер мет дунд сурһульмудт эклц классмудын сурһульчнр халун хотар өңгәр теткгднә. Шин сурһулин җилд белдәд олн үртә өрк-бүлин сурһульч болһнд мөңгнә дем йилһгднә. Эльвира Анатольевнан хувалцсар, эннь эднд икәр туслна.
Терүнәс нань эн җилд мана таңһчд һаха сарин һурвдгч нарн өдрлә олн үртә өрк-бүлин сән Өдр зарлгдв, энүнәс иштә таңһчд бәәдг кесг бүлмүд 50 миңһн арслңга дем авсмн. Эн бүлмүдин тоод Омакаевихн бас орв. Тер мет олн үртә эк Омакан Эльвира олна бәәдл-җирһлд шунмһаһар орлцна. 2024 җилд өрк-бүлин җиллә ирлцүлҗ, экин Өдрлә Көтчнрә районд давулгдсн марһанд орлцад, нәрн шинҗиг ах цагин эргцд тәәләд ончрв.
Байр-нәр учрсн цагт эдн өөрхн элгн-садтаһан хамдан цуглрҗ, төгрг ширә эргҗ сууһад, эврәннь күцәмҗин тускар хувалцҗ, сенр хот эдләд, цаган сергмҗтәһәр давулна. Ачнр-зеенрин түрүн ишкдлинь үзҗ, түрүн үгмүдинь соңсч, дунд сурһульд һараснь көтләд күргдг эңкр аавнр-ээҗнрнь бийән хөвтә улст тоолна.
Селәнә һазрт дунд сурһуль болн тааста көдлмш бәәхлә, тенд бәәҗ болхмн. Омакаевихнә баахн өрк-бүл балһснур нүүхәр седҗәхш. Өнр-өсклң эн өрк-бүл цааранднь малан өскәд, өвкнриннь авъясан хадһлҗ, үрдиннь хөв-кишгинь үзҗ, цаһан хаалһар йовтха!

КАРСАНА Евгения