Көдлмшән ясрулхар дамшлтарн хувалцв

Үкр сарин эклцәр Геленджик балһснд Әрәсән нүднә харань муурсн улсин ниицәнә (ВОС) нүүрләчнрин ик хург болв. Краснодарск крайин региональн әңгин седвәрәр бүрдәгдсн керг-үүлдвр президентск мөрән саңгин дөңгәр давулгдв. Терүнд Әрәсән Өмн үзгин болн Ар Кавказин федеральн округудын 19 региональн бүрдәцин 80 һар элч цуглрв. Хальмг Таңһчас ВОС-ин региональн әңгин ахлач Эрнцнә Людмила болн энүнә нөкд Оруса Лидия орлцв.

Әрәсән нүднә харань муурсн ниицәнә ахлач Владимир Сипкин болн Краснодарск крайин ниицәнә ахлач Юрий Третьяк хургиг секәд, Өмн үзгин болн Ар Кавказин регионмудт үүлддг олна бүрдәцс эрмдгтә улсин зөв харслһна, социальн дөң күрглһнә төрмүд хаһлҗ дөң күргдг төләднь ханлтан өргҗ, көдлмштнь күцәмҗ дурдв. Гемтә-шалтгта улсин төрмүд хаһлхин кергт өдгә цага эв-арһс олзллһна, шаңһа йосна бүрдәцслә нөкцҗ үүлдҗ, социальн туслмҗ күрглһнд мөрә шүүҗ авч олн зүсн көтлврмүдт орлцлһна тускар эдн келв. Хургт орлцачнр кеҗ-күцәҗәдг көдлмшиннь тускар хувалцҗ, коммерческ биш бүрдәцс (НКО) дунд болдг марһаст орлцҗ мөрә шүүҗ авлһна туст дамшлтарн хувалцв. ВОС-ин болн Краснодарск крайин йосна бүрдәцс чинртә төрмүдәр харһлтс бүрдәв. Тиигәд, алвна болн күч-көлснә туст батлгдсн шин закадын, мөрә шүүҗ авч ямр нег төсв күцәлһнә, реабилитацин техническ эв-арһсар тетклһнә, олнд зәңгллһнә бүрдәцслә хамцу үүлдхин болн нань чигн төрәр өргн күүндвр болв. Хургт орлцачнр һурвн өдрин туршарт эврәннь төсвсин тускар келв, «төгрг ширән» сүүрт орлцҗ олна ниицәсиг үүмүлҗәдг төрмүдәр ухан-тоолврарн хувалцв. Тер мет нүднә харань муурсн улсин төлә өдгә цага шишлң кергслин һәәхүл болв, терүнд эрмдгтә улсин җирһлин таал ясруллһнд туслх шинрлтс үзүлгдв.
- Мана ниицән коммерческ биш бүрдәцс дунд болсн марһанд орлцад, шүүҗ авсн мөңгәр нүднә харань муурсн улсин төлә «Аудио-гид «Зүркәрн соңстн» гидг төсв белдсн билә. Мана таңһчла хам-хоша бәәдг Әәдрхн, Аһш, Ростов-на-Дону, Сарпуль, Краснодар болн Хазн балһсдас ут тоодан 63 күн ирәд, нүднә харань муурсн улсин төлә бүрдәгдсн экскурсьт орлцсн билә. Эн хургт бидн эн төсвин тускар хувалцад, гиичнрт мана таңһч таасгдсна тускар келвидн. Эдн гемин уршгар үзҗ чаддго болв чигн мана хотл балһснла таньлдҗ, өдгә цага эв-арһ олзлҗ иим экскурсь бүрдәснд ханлтан өргсмн. Мана дамшлт хургт орлцачнриг соньмсулв, кесгнь өөрдәд, терүнә тускар сурад, бас тиим төсв белдх санаһан медүлв. Бидн талдан регионмудын күцәмҗәр бас соньмсҗ, иргчдән теднә дамшлтыг олзлҗ ямр нег төсв белдхин тускар үгцвидн. Гемтә-шалтгта улсин олна ниицәс цагин некврлә ирлцҗ шин эв-арһс олзлҗ көдлхәр шунна, тегәд хоорндан дамшлтарн эрк биш хувалцх кергтә. Иим харһлтс шин залһлда батрулҗ, көдлмшән ясрулхд туслна. Бидн терүнд орлцад, шин медрл хоршаҗ, эврәннь көдлмшиннь тускар хувалцсндан байрта бәәнәвидн, – гиҗ Оруса Лидия келв.

ДООҖАН Наталья
ЗУРГТ: Геленджик балһснд болсн ВОС-ин нүүрләчнрин хургт орлцачнр