«Келн-улсин бахмҗ» мөрәһәр ачлв

Хальмг Таңһчин Толһач Хаска Батун даалһврар Хальмг Таңһчин Улсин Хуралын (Парламентин) Ахлач Артем Михайлов күч-көлснә ветеран Гелий Кимд Өмн үзгин дуһргин «Келн-улсин бахмҗ - 2025» гидг олна мөрән лауреат болснлань йөрәв. Таңһчин делгрлтд ик тәвцән орулсн Гелий Ким Советин Союзин Баатр Б.Б.Городовиковин орденәр ачлгдсмн, Хальмг Таңһчин күндтә иргн болна. Одахн эн Әрәсән Өмн үзгин дуһргт «Келн-улсин болн сойлын негдлтстин күцәмҗтә нүүрләч» гидг марһанд диилвр бәрв.
Артем Михайлов Хальмг Таңһчин Толһач Хаска Батун илгәсн йөрәлин бичгиг умшад, Гелий Константиновичин ач-тус темдглв. «Хальмг Таңһчин элчнр түрүн болҗ эн чинртә мөрән лауреатнр болв. Эн мөрәһәр ачлгдсн улс таңһчин болн орн-нутгин делгрлтд ик тәвцән орулв. «Келн-улсин бахмҗ - 2025» гидг олна мөрә иргнмүдин ниицлтиг, нег-негән тевчҗ Әрәсән улсин иньгллт батруллһнд туслх гиҗ ицҗәнәв», – гиҗ йөрәлин бичгт келгдҗәнә.
- Одахн Әрәсән Президент Владимир Путин келн-улс хоорндк хәрлцәнә хүүвин селвлцәнд 2026 җилд мана орн-нутгт улсин ниицлтин җил зарлхиг дөңнәд, шишлң шиидвр белдх даалһвр өгв. Орн-нутгин толһачин темдглсәр, олна болн келн-улсин ниицлтиг хадһлх кергтә. Әрәсән мөрән лауреатнрин көдлмш олн келн-улсин ниицлт делгрүллһнд туслх гиҗ ицҗәнәв. Та эврәннь үнн-чик күч-көлсәрн болн төрскн һазр-усндан итклтә болсарн таңһчин делгрлтд ик тәвцән орулҗ, ачта болн күндтә күн болвт. Эн мөрәһәр Хальмгин Баатр, РСФСР-ин билг-эрдмин ачта үүлдәч, Хальмг АССР-ин күндтә артист, «Өөрднр» бииһин театрин художественн һардач Нәдвдә Петр бас ачлгдснь темдгтә. Мана нег һазра улс эн чинртә мөрән лауреатнр болснь бахмҗта, – гиҗ Артем Васильевич келв.
Харһлтд орлцсн «Әрәсән улсин Ассамбелей» бүрдәцин таңһчд үүлддг әңгин ахлач Бембин Евгений болн Хальмгт корей улсин негдлтин һардач Улана Наталья Гелий Кимиг өөдән ачлвр авснлань йөрәв.
БАТАН Сәәхлә