Төрскн һазртан көдлхиг урмдулхар

Шидр Әрәсән эрүл-менд харлһна министрин дарук Татьяна Семенован һардврт болсн селвлцәнд медицинск болн фармацеватическ дунд шишлң болн ик сурһуль төгсәсн баһчудыг көдлмшәр тетклһнә төрәр өргн күүндвр болв. Ниигмин сүлҗәнә эв-арһар болсн селвлцәнд орн-нутгин регионмуд орлцад, чинртә төрәр ухан-тоолврарн хувалцв. Хальмг Таңһчин эрүл-менд харлһна министр Саран Булат, Б.Городовиковин нертә Хальмг ик сурһулин һардач Салан Бадм, Т.Хахлынован нертә медицинск колледжин һардач Манҗин Кермн болн таңһчин эмнлһсин ах эмчнр селвлцәнд орлцв.

Мана таңһчд эрүл-менд харлһна эрдм дасчадг баһчудт онц оньг тусхагдна. Нег үлү таңһчин эмнлһслә бооца батлҗ сурһуль сурчадг оютнрт хойр дам килмҗ тусхагдҗ, эрдмәрн ирҗ көдлхин төлә цуг таал тогтагдна. Ода деерән мана таңһчас 211 күн, эннь 169 оютн болн 42 ординатор сурчана. Хальмг Таңһчин Толһач Хаска Батун дөңгәр Хальмг ик сурһульд таңһчин хазнас йилһгдсн мөңгәр 150 оютн медицинск дацңд сурчана. Түрүн баһчуд 2028 җилд сурһулян төгсәһәд, эмчин эрдмтә болхмн. Таңһчин эмнлһсиг эрүл-менд харлһна көдләчнрәр тетклһнә төр хаһлхин төлә министерств олн зүсн көтлвр күцәнә. Тиигәд, таңһчин хазнас йилһгдсн мөңгәр баһчудыг сурһна, ординатурт сурчадг оютнриг эмнлһст көдлмшәр теткнә, гер-бүүр нәәмәдлһнд, жилищн-коммунальн туслмҗд һарһсн мөңгинь даңцана, зәрм райодт селән һазрт көдлхәр ирсн эмчнрт нег дәкҗ дөңцл мөңг өгнә. Тер мет «Земск эмч/фельдшер» гидг шаңһа көтлвр селәнә эмнлһст әмтн одҗ көдлхиг урмдулна. Үлгүрнь, эн җил Яшалтан района эмнлһнд 11 эмч, Городовиковск района эмнлһнд 5 эмч ирҗ көдлдг болв.
Сурһульчнр иргчдән эрүл-менд харлһна көдләчин эрдм шүүҗ авхин төлә сурһуль-эрдмин бүрдәцст шишлң классмуд бәәнә. Терүнд сурдг күүкд-көвүд химийин болн биологийин халхар гүн медрл авч, хөөннь медицинск дунд шишлң болн ик сурһульд орна. Ода мана таңһчд 400 сурһульч шишлң класст сурчана. Таңһчин эмнлһсин көдләчнр сурһульчнрла харһҗ, эрүл-менд харлһна көдләчин эрдмин тускар келҗ өгч, эн халхар хөөннь сурхиг урмд өгнә. П.Жемчуевин нертә таңһчин эмнлһн селәдин сурһулин бүрдәцслә бат залһлда бәрҗ, сурһульчнрин төлә харһлтс бүрдәнә.
- Эндрк селвлцәнд эркн чинртә төр босхгдв. Бидн Хальмг ик сурһулин һардач Салан Бадмла, медицинск дацңгин һардач Бадмин Саглрла, медицинск колледжин һардач Манҗин Кермнлә болн таңһчин эмнлһсин ах эмчнрлә хамдан эн төр мана таңһчд ямр кевәр хаһлгдҗахин тускар күүндвидн. Әрәсән эрүл-менд харлһна министерств шишлң ормд оютнриг дасхлһна туст закана төсв белдәд, эдн хөөннь эмнлһст ирҗ көдлхиг урмдуллһна седвәр татв. Региона даалһврар шаңһа мөңгәр сурһуль сурчадг оютнр хөөннь эрк биш ирҗ көдлх зөвтә. Сурһулян төгсәсн баһчудыг көдлмшәр тетклһнә төр цуг регионмудын төлә нәрн болҗана. Мана таңһчд эмнлһст эмчнр, дундын медицинск көдләчнр кергтә болҗана. Хальмг Таңһчин залврин дөңгәр бидн эн төриг хаһлхар дигтә-дарата көдлмш кеҗәнәвидн, – гиҗ Саран Булат келв.
ДООҖАН Наталья