Эмнлһнд бәәдг бичкдүдиг дөңнхәр

«Негдсн Әрәсә» парть удан цагт эмнлһнд бәәдг бичкдүдиг дөңнхин төлә җил болһн «Корзинка храбрости» гидг буйнч седклин керг-үүлдвр бүрдәнә. Шидр Элст балһснд олна дөңнлтин штабин улд эн керг-үүлдвр эклв. Элст балһсна Хургин Ахлач Максим Сорокин, Хальмг Таңһчин Улсин Хуралын (Парламентин) депутат Пүрбән Олег, ЭГС-ин депутатнр Чумуда Николай болн Дорҗин Бадм дарани керг-үүлдвр секлһнд орлцад, бичкдүдт нерәдсн белгән авч ирв.

- Эн керг-үүлдвр эмнлһнә бүрдәцст удан цагт бәәдг бичкдүдиг дөңнҗ, тааста наадһа белглҗ урмд өгхин төлә бүрдәгднә. Нидн мана таңһчд болсн керг-үүлдврин йовудт өр-өвч седклтә улс ут тоодан 4 миңһн наадһа, дегтр, канцелярск кегдлмүд авч ирсн билә. Эн җил мана бичкдүдиг бас сәәнәр дөңнҗ эн кергт орлцтн гиҗ нег һазра улст дуудвр кеҗәнәв. Бичкн болв чигн белг эмнлһнд бәәдг күүкд-көвүдт дарунь эдгәд герүрн дарунь хәрхд туслтха, – гиҗ Максим Сорокин дурдв.
Келхд, давсн җилд «Негдсн Әрәсә» партин керг-үүлдврт 500 миңһн наадһа цуглулгдв. Терүг орн-нутгин эмнлһст бәәдг бичкдүдт белглв. Эн керг-үүлдврт күн болһнд орлцҗ дөңгән күргҗ чадҗана. Олна дөңнлтин штабд шишлң яршг углҗ тәвгдсн бәәнә. Күнд гемин учрар удан эмнлһ авчадг, гүн шинҗллт кеҗәдг бичкдүд бийдән тааста наадһа шүүҗ авч чадхмн. Кемр эн кергт орлцх санан бәәхлә, шин наадһас, дегтрмүд, үүдәлтин төлә кергтә кегдлмүд, канцелярск эд-тавр авч ирҗ шишлң яршгт үлдәх кергтә. Буйнч седклин керг-үүлдвр бар сарин 2 күртл болхмн. Керг-үүлдвр төгсснә хөөн цуглулгдсн наадһас таңһчин эмнлһст бәәдг бичкдүдт өггдхмн.
БАТАН Сәәхлә
Зургт: «РИА «Калмыкия» агентствин һардач
Марила Хоңһр