Алдр генерал таңһчиг босхла

Алдр генерал, цецн ухата, хол хәләцтә чадмг һардач Басан Городовиковин 115 җилин ончта өөниг үкр сарин 15-д Хальмг Таңһчд темдглх. Кесг райодар түүнә нертә талвңгуд, паркс секгдх, талдан чигн керг-үүлдвр күцәгдх. Тууврин хөөн таңһчиг босхлһна алдр кергиг Басан Бадьминович ахр болзгт күцәҗ, селәнә эдл-ахуг болн олн халхта салг-үүлдвриг бүрдәсмн. Тер алдр кергинь хальмг олн улс кезә чигн мартшго, тиим кевәр билгтә һардачин күчн-чидләр өдгә цагин бәәдл-җирһлин бат ул тогтагдсмн. Түүнә һардврт тууврин хөөн сурһульмуд, эмнлһнә гермүд, хаалһс тосхгдҗала. Арвн долан җилдән Басан Городовиков Хальмг Таңһчиг толһалҗ нерән туурулсмн.

Тәвн җил хооран 1975 җилин һаха сарин 1-д Элстин хойрдгч болн зурһадгч микрорайодын хоорнд хотл балһсна хамгин ик 17-ч тойгта һурвн давхр у-өргн сурһулин гериг туурмҗта генерал, седвәртә һардач Басан Бадьминович Городовиков сексн болдг.
Тиигхд Элст балһсн болн бүклдән Хальмг Таңһч түргн йовудтаһар өсәд-өргҗәд, нилхд олар һарад, сурһульмудын гермүд күртҗәсн уга билә. Болв Басан Городовиковин нилчәр селән болһнд дунд сурһульмуд тосхгдсмн.
1961 җилин ноха сарас авн Басан Бадьминовичин һардврт мана таңһч йостаһар делгрәд цецгәрв. Эндр өдр таңһч сән йовудтаһар делгрҗәнә, мана өвкнрин үлдәсн байн зөөриг байҗулх керг күцәгдҗәнә. Алдр һардач Басан Городовиковин герәслһәр мана таңһч өдр ирвәс өсәд-өргҗәд йовхнь бахмҗта йовдл мөн.

ТҮРВӘН Һуна