Яшкулин биичнр марһанд ончрв

«Краса нации» гидг нертә нарт-делкән марһанд Яшкулин бичкн биичнр эврә билгәрн олн хәләһәчнриг өврүлв. Хәләврин жюри болхла биичнриг өөдәнәр үнлв.

Яшкулин биичнрин «Тууль» гидг коллектив бииһин эрдмиг дасч авсмн. Сарән Айсан һардврт биид дурта бичкдүд хальмг болн нань чигн би дасч авна. Билгтә биичнр Айса Цедыровна заасн тоотыг арднь орҗ дасад, көгҗмиг дахч биилдгиг, бииһин эрглт болһниг давтж, би болһна ончинь үзүлхәр шунна. Айса Цедыровна бииһин эрдмиг йир сәәнәр заадгинь түрүләд биичнр бийснь медҗ авв. Эднә бииг әмтн оньган өгч хәләснь бичкдүдт таасгдҗ, эрдмиг улм сәәнәр дасч авхд туслна. Дарунь эднә эк-эцкнь күүкд-көвүднь концертст орлцҗ, билгән үзүлсинь хәләһәд, эднә үрднь сән белдвр авчахинь медв. Тиигәд сән кевәр үүлдҗәдг бииһин эн коллектив хойр җил хооран үлгүр болгч билг-эрдмин коллективин өөдән нер зүүсмн.
Айса Цедыровнан һардврт бииһин эрдмән өдр болһн ясрулад, эн җил коллектив түрүн болҗ ик марһанд орлцхар зөрглв. Тиигәд Яшкулин биичнр Грозный балһснур һарч йовв. Тенд билг-эрдмин олн халхар болсн «Краса нации» нарт-делкән марһанд хальмг артистнр билгән үзүлв.
Ах багин биичнр биилсн «Баатрмудын нойхд» би негдгч ормд һарв. Дунд багин артистнр болхла, «Бичкн кер мөрн» би бииләд, эврә насна орлцачнр дунд хойрдгч мөрә шүүҗ авв.
Бичкн багин биичнр чигн бас мөрәлгдв. «Крылья матери» гидг чеченск би биилҗ, һурвдгч орм эзлв.
Сарән Айсан чадмг һардврт биичнр бииһин өвәрцинь янзлулҗ үзүлҗ чадсинь жюри темдглв. Биичнр бийснь ик байрта бәәнә. Эк-эцкнрнь күүкд-көвүдин шунлтыг дөңнәд, биид кергтә хувциг уйлһнд, хаалһд һарч йовхднь сән дөң болв.
- Орн-нутгин талдан олн һазрас ирсн бичкн артистнрин билг-эрдмлә мана биичнр таньлдв, - гиҗ Айса Цедыровна ухан-тоолврарн хувалцв. - Грозный балһсна ке-сәәхн тоотыг күүкд-көвүд хәләв. Мини сурһульчнр дассн бииһән йилһән сәәнәр үзүлснь нанд ик байр болв. Иигәд эдн түрүн сән дамшлт авв.
«Краса нации» гидг нарт-делкән марһанд орлцҗ, һурвн мөрә авч ирсн коллективиг Яшкулин района һардвр йөрәв. Үүдәгч эн ик күцәмҗд билгтә коллективин һардач Сарән Айсан болн эк-эцкнрин ик тәвцинь үнлҗ, йөрәлин үгд темдглв.
ҖИРҺЛИН Кермн