Таңһчин селән болһнд күрхәр

Эн җилин үкр сарин 19-д Хальмгин нер туурсн ансамбль таңһчин селәдәр гастрольд һарч йовхмн. «Бамб цецг» ансамбль җил болһн селән һазрар һарч йовдг авъяс бәәсинь әмтн тодлна. Болв олн зүсн учрар таңһчин цуг һазрар эргҗ йовх таал эднд кесгәс нааран учрад уга бәәсмн. «Тюльпан, уралан!» гидг дуудвртаһар ансамбль эн керг-үүлдврән күцәҗәнә.

Гастролин йовудт «Бамб цецг» шаңһа академическ ансамблин керг-үүлдврмүдин тускар ансамблин һардач Катан Савр «Калмыкия» таңһчин зәңгллһнә агентствд болсн брифингд келҗ өгв. Бүкл сарин туршарт ансамблин артистнр райодын селәдәр йовҗ, бәәрн улст концертс үзүлхмн. Ансамблин эн йовлһиг бүрдәҗ давуллһна көдлмшиг күцәҗәдг Конан Цедн ямаран райодын селәдт артистнр күрхин тускар тодрха цәәлһвр өгв. Гастрольд урдаснь белдвр кегдсмн. Район болһна толһачнрла күүндәд, кезә, ямаран селәнд одхан диглҗ авсмн. «Бамб цецгин» седвәриг дөңнәд, хол селәдт күрхднь толһачнр туслхар үгән өгв. Концертс болх селәдин ахлачнрла чигн урдаснь күүндвр кегдв.
Катан Саврин келсәр, иим төсв күцәх ухан 2023 җилд үүдв. Селәдәр гастрольд йовлһн шин керг биш. Тиим дамшлт урднь чигн бәәсмн. Медәтнрин тодлврар, урдк цагт ансамбль хаалһд һарч йовхларн, одсн селәдтән хонад, һардг бәәҗ. Болв ода тиигҗ йовдг арһ уга. Болв чигн селән болһнд күрх седкл бәәнә. Селән һазрт тәәз ямаран болна, терүнәс иштә тенд үзүлгдх тоотнь диглгдхмн. Ансамблин артистнр багмудар хувагдҗ, сойлын гер уга селәдт чигн күрч үзхмн. Хамгин бичкн гисн багд хойр биич, дууч, көгҗмч орхмн. Бәәрн һазрин әмтнд дурта дууһинь дуулҗ, бииһәрн сергмҗ үүдәхәр артист болһн шунҗана. Селән һазрт ансамбль ирсн йовдл ик байр үүдәнә.
Савр Вячеславович тодлҗ келсәр, 1993 җиләс нааран сард зуг нег-хойр дәкҗ райодар ансамбль һарч йовҗасмн. Ик зуудан района төвдт, эс гиҗ ик селәдәр йовдг бәәсмн. Холд бәәдг селәдт күрдго бәәсмн. Ода бидн цуг селәдт күрхәр шиидвидн.
Ансамблин артистнриг багмудар хуваҗ, кесг һазрт күрх тоолвран дәкн нег давтад, нег өдрин дунд тиигәд һурвн һазрт концерт үзүлхәр бәәхән һардач медүлв. Үлгүрнь, үкр сарин 19-д ансамбль Сарпан района Обильное, Шарнут болн Садовое селәдт концертсән үзүлхмн. Тиигәд район болһнд ирәд, һурвн һазрт концерт үзүлх таал учрҗана. Элстд ирҗ, концерт хәләдг арһ уга селәнә улст эннь йир сән болхмн. Тиигәд 43 селәнд күрх зура бәәнә. Иргчдән одх селәдин то икдәд йовхмн. Конан Цеднә темдглсәр, эн йовлһна һол күслнь - хамгин холд бәәдг селәдт күрч, әмтнд байр үүдәх керг мөн. Артистнр эн йовлһнд белн. Бичкн селәдт күрхд дөң болх райодын толһачнрт, селәдин ахлачнрт ханлтан медүлҗәнәвидн.
Катан Савр ашлҗ келхләрн, эн йовлһн үкр сарин 19-әс авн бар сарин 19 күртл болхинь темдглв. Эн кемлә үзүлгдх концертст ансамблин алтн көрңд орсн ду-би болн көгҗм соңсгдхмн. Төрскән харсачин җилд болҗадг эн йовлһн баатрмудын зөргт нерәдсн дуудла әмтиг таньлдулхмн. Бииһин дөңгәр чигн эн төр олна оньгт тусхагдхмн.
Ансамбль эн җил Әрәсән балһсдар йовад, «Санлын хаалһс» гидг концертс үзүлсмн. «Бидн - Әрәсә» гидг шаңһа төсвин кемҗәнд тернь күцәгдлә. Төрскән харсачин җилд нерәдсн эн концертс хәләһәчнрт таасгдҗана.
Бар сарин 19-д Элст балһснд «Бамб цецг» ансамбль концерт үзүлҗ, гастрольмуд төгсхмн. Төрскән харсачин җилин ашар болх концерт салдснрин экнрин комитетлә хамдан кегдхмн.

ХӨӨЧИН Галина