Бәәрн һазрт йос заллһна халхар

Одахн Хальмг Таңһчин элчнр «Бичкн төрскн – Әрәсән күчн» гидг Цугәрәсән муниципальн хургин региональн өдрмүдт орлцв. Сарпан района муниципальн бүрдәцин толһачин дарук Бембин Галина болн Целинн района һардврин аппаратын һардач Джунан Данара Ленинградск мүҗд болсн керг-үүлдврт орлцад, талдан регионмудын дамшлтла таньлдв, шин медрл хоршав. Эн керг-үүлдвр «Иргчин социальн политик: муниципалитетмүдиг ясрулдг шиидвр» гидг төрәр болв, тегәд регионмудын муниципальн йосна элчнр әмтнә социальн теткврин, баһчудын, спортын бүрдәцст одад, теднә көдлмшлә таньлдв.

- «Бичкн төрскн – Әрәсән күчн» гидг Цугәрәсән муниципальн хург җил болһн болна. Эн орн-нутгин муниципальн бүрдәцсин делгрлтд туслх керг-үүлдвр мөн. Терүнд бәәрн залврин нүүрләчнр, олна бүрдәцсин болн бизнесин элчнр, шинҗләчнр орлцҗ, орн-нутгин делгрлтин, әмтнә җирһлин таал ясруллһна төрмүдәр күүндҗ, дамшлтарн хувалцна. Эн ик хургин йовудт региональн өдрмүд болна, эн җилин хулһн сарас авн 2026 җилин моһа сар күртл болх керг-үүлдврмүдт муниципальн бүрдәцсин 5 миңһн һар элч орлцхмн. Региональн өдрмүд Лениградск, Иркутск, Тюменск, Липецк, Әәдрхнә мүҗст, Саха (Якутьд) болн Башкортостанд, Сарпулин крайд болхмн. Эн керг-үүлдврмүдин йовудт социальн, йиртмҗ харлһна, өдгә цага эв-арһсин болн нань чигн төрмүд хәләгдәд, сән гисн дамшлтс болн седвәр хөөннь 2026 җилин мөрн сард Москва балһснд болх «Бичкн төрскн – Әрәсән күчн» гидг Цугәрәсән муниципальн III хургин көтлврт орхмн. Би түрүн болҗ иим ик хургт орлцлав. Мана района һардврт социальн төрмүдәр үүлддг төләдән Ленинградск мүҗд болсн региональн өдрмүдт орлцснь нанд туста болв. Бидн Тосно болн Гатчина балһсдт одад, социальн бүрдәцсин көдлмшлә таньлдвидн. Маднд Әрәсән Орн-нутгин Хүүвин депутатнр, Әрәсән бәәрн залвриг делгрүллһнә негдлтин (ВАРМСУ) һардачнр, Әрәсән Олна палатын, олна тоолвр шинҗллһнд туслдг саңгин элчнр чинртә төрәр илдкл умшҗ, «төгрг ширән» сүүрт өргн күүндвр давулв, - гиҗ Бембин Галина келв.
Ленинградск мүҗд социальн төрмүд ямр кевәр хаһлгдҗахнь таңһчин элчнрт соньн болв, тегәд эдн Гатчинск муниципальн дуһргт одад, тенд болсн керг-үүлдврт орлцв. Хуучн балһснд кесг зун җил хооран тосхгдсн гермүдлә зерглҗ өдгә цага шин тосхлтс ирсн гиичнрин оньг авлв. Муниципальн дуһргин медлд 16 бәәрн заллт орна, эднд нег хазн бәәнә. Урднь Ленинградск мүҗин һардврт көдлҗ йовсн Людмила Нещадим ода муниципальн дуһргиг һардҗана. Эн күцәгч йосна халхд олн җилдән көдлҗ, байн дамшлтта, чаңһ неквртә, чадмг һардач болна. Хойр җил хооран бәәрн йосна шиидврәр әмтнә социальн харслтын болн теткврин бүрдәцс негдүлгдәд, олн халхин бүрдәц болад үүлдв. Эдн муниципальн дуһргин медлд үүлдҗ, олн зүсн төр хаһлна, олн халхин нег бүрдәц болснь олзта-орута болв. Ик хургт орлцачнр сурһулин болн социальн бүрдәцст, баһчудын төвд одад, эднә үүлдврлә таньлдҗ, бичкдүдин, олн үртә өрк-бүлмүдин, медәтнрин төрмүд энд яһҗ хаһлгддгин, ямаран керг-үүлдврмүд күцәгддгин тускар медҗ авв. Галина Васильевнан келсәр, «Росмолодежь» гидг орн-нутгин бүрдәцин марһанд орлцад, шаңһа мөрә шүүҗ авч хуучн бәәрнд баһчудын төв секч, өдгә цага сән таал тогтаснь соньмсулв. Цергә шишлң керг-үүлдврт орлцачнр бичкдүдлә болн баһчудла көдлҗ, эднд төрскнч сурһмҗ өглһнә дамшлтла таньлдснь бас туста болв. Спорт делгрүллһнә халхар күцәмҗтә үүлдврнь бас тодлгдв. Тиигәд, Ленинградск мүҗд спортын клубмудын үүлдвр муниципальн йосна бүрдәцсин көдлмш үнллһнд учртан авгдна. Эннь спорт делгрүллһнд туслдг болв.
- Бәәрн залврин йосна һол күслнь әмтнә җирһлин чинр ясруллһн болна. Әрәсән Президент Владимир Путин бәәрн залврин бүрдәцсин чинрин тускар келхләрн, эн халхар көдлдг улс нег һазра әмтнә сә хәәҗ, эднә җирһлин таал ясрулҗ, селәнә, района эс гиҗ балһсна делгрлтин төрмүдиг даавртаһар хаһлх зөвтә гив. Муниципальн йосна бүрдәцс күцәмҗтәһәр көдлхлә, әмтн эдниг үүмүлҗәдг төрмүд эрк биш хаһлгдҗахиг медхмн гиҗ орн-нутгин толһач келсмн. Тегәд ясгдсн сурһульмуд, эмнлһс, тосхгдсн шин хаалһс, гермүд энтн хамгин түрүнд әмтнә итклиг батрулҗахнь мөн. Әрәсән кесг регионас ирсн муниципальн бүрдәцсин элчнр харһад, эврә көдлмшин, ямр нег төр хаһллһна туст хоршасн дамшлтарн хувалцҗ, хоорндан таньлдад, цаган тустаһар давулснь таасгдв. Керг-үүлдврт хоршасн медрлән көдлмштән эрк биш олзлҗ, күцәмҗтәһәр үүлдх санатав. Иим харһлтст орлцҗ, эврәннь күцәмҗин тускар медүлҗ, талдан регионмудт күцәгдҗәдг көдлмшлә таньлдх кергтә. Региональн өдрмүдт, муниципальн бүрдәцсин хургудт орлцсн элчнр цуглрад, таңһчд бас иим керг-үүлдвр давулх кергтә гиҗ санҗанав. Мана таңһчд бәәрн залврин бүрдәцсин чинр җил ирвәс өөдләд йовна. Селәдин болн райодын муниципальн бүрдәцс бичкн төрскнәннь делгрлтин төлә баһ биш көдлмш кеҗәнә, тегәд дамшлтарн хувалцҗ, өмәрән зүткҗ үүлдхмн, - гиҗ Галина Васильевна келв.
Бәәрн залврин бүрдәцст көдлдг улс күцәмҗтәһәр үүлдҗ, нег һазра әмтнә даавриг иткүлхин төлә мана орн-нутгт, тер тоод Хальмг Таңһчд олн зүсн керг-үүлдврмүд бүрдәгдҗәнә. Одахн Хальмг Таңһчин муниципальн бүрдәцсин хүүвин негдлт райодын болн селәдин бәәрн йосна элчнрин төлә сурһуль бүрдәсн билә. «Бичкн төрскн – Әрәсән күчн» гидг Цугәрәсән муниципальн хургт орлцсн Бембин Галина болн Джунан Данара Хальмг Таңһчин муниципальн бүрдәцсин хүүвин негдлтин ахлач, Октябрьск РМО-н толһач Увшан Басңд болн эн негдлтин күцәгч һардач, Целинн РМО-н толһач Опин Эрдньд ханлтан өргҗәнә.

ДООҖАН Наталья