Цергә үүрмүд харһв

Үкр сарин 13-14д Аһш балһснд Өмн үзгин дуһргин цергә шишлң керг-үүлдврин ветеранмудын харһлт болв. ЮФО-н нәәмн региона, тер мет ЛНР-ин, ДНР-ин, Запорожск болн Херсонск мүҗсин элчнр терүнд орлцв.

«Сталинградская битва» нертә музейин талвңд СВО-н ветеранмудын бүрдәц эн керг-үүлдвриг давулв. Аһшин мүҗин хүүвин ахлач Александр Блошкин харһлтыг секв.
– Алдр Диилврин 80 җилин өөнлә болн Төрскән харсачин җиллә ирлцҗ мана Баатр-балһснд харһҗахнь темдгтә. Аһш балһсн олн-әмтнә төлә залу-зөргин, төрскнч седклтә улсиг өскдг, өвкнрин туурмҗиг әрүнәр хадһлҗадг балһсн болна. Өдгә цагт Диилврин үйин ачнр-зеенр Төрскән зөргтә кевәр харсч йовна, – гиҗ Александр Иванович темдглв.
Терүнәс нань Аһшин Парламентин, Әрәсән Президентин һардврин болн регионмудын йосна элчнр керг-үүлдврт бас орлцв.
Хальмг Таңһчас СВО-н ветеранмуд Чумуда Николай, Отан Евгений, Ханан Дольган, Увшан Виктор болн Манҗин Мергн энүнд орлцсн болдг. Келхәс, эдн «Баатрмуд-08» көтлврт орлцачнр болна.
Хальмгин СВО-н ветеранмудын бүрдәцин һардач Чумуда Николайин келсәр, тиим харһлтс эрк биш кергтә, тер юңгад гихлә цергә үүрмүдтәһән харһад, дамшлтарн хувалцад, эндрк чинртә төрмүдиг хаһлад, олна кергин төлә тәвцән цааранднь орулхар белн бәәхән медүлвидн. Энүнд орлцсн нег һазра мана көвүд зөргтә, дааврта болсн деерән цаһан седклтә, тевчңгү, халуч зүрктә улс болад, Хальмг Таңһчин улсин төлә бахмҗ үүдәҗәхинь темдглх кергтә.
Тер мет СВО-н ветеранмудын харһлтын йовудт олн зүсн керг-үүлдврмүд давулгдв. Мана делегацин элч Отан Евгений болхла СВО-н ветеранмудын бүрдәцин медаляр ачлгдсн билә.
Хальмг Таңһчиг һардҗ йовсн Чумуда Николай белдсн зурц үзүләд, нег һазра мана СВО-д орлцачнрин төлә күцәҗәдг көдлмшин тускар тодрхаһар келҗ өгв. Мана таңһчин улс Төрскән харсчадг дәәчнрин төлә буйнч седклин кергүд даңгин бүрдәнә. Нег һазра арһлачнр, эгл улс чигн чадсарн хамг юм цуглулад СВО-д илгәнә. Терүнәс нань һартан өөтә күүкд улс өөмс, беелә өлгәд, талдан дулан хувц уяд чигн бас йовулна. Тер мет цергә шишлң кергсл бас хулдҗ авгдна.
Харһлтд орлцачнр Мамаевин өөдмд одад, Төрскән харсгч Алдр дәәнд болн СВО-н йовудт әмнәсн хаһцсн өвкнрин болн үүрмүдин санлынь тевчв.

КАРСАНА Евгения