Экин өдрт нерәдәд

Шидр Элстд олна дөңнлтин штабд экин Өдр угтҗ «Мама – навигатор счастья» гидг соньн харһлт болв. Эн керг-үүлдвр «Негдсн Әрәсә» партин «Бат өрк-бүл» гидг төсв күцәлһнә йовудт бүрдәгдв. Хальмг Таңһчин Улсин Хуралын (Парламентин) депутат, партин төсвин региональн зүүцүләч Мацга Татьяна харһлтыг секәд, күүкд улсиг өөрдҗ йовх сән Өдрлә йөрәһәд, эднд бат эрүл-мендин бәәдл болн хөв-кишг дурдв.

- «Бат өрк-бүл» гидг төсв социальн чинртә, терүнә йовудт өнр-өсклң өрк-бүлмүдиг, олн үртә эк-эцкнрин седвәр дөңнлһнд нерәдгдсн керг-үүлдврмүд болна. Йириндән эк, күүкд күн герин чимг болна. Тегәд экнь тааста эрдмәрн күцәмҗ бәрҗ көдлхлә, күүкднь чигн энүнәс үлгүр авч билгтә, седвәртә болад, сурһулян сәәнәр сурад олна нүүрт йовна. Өрк-бүл бат, ниитә болхла, мана орн-нутг чигн бас өмәрән зүткҗ бат болх, - гиҗ депутат темдглв.
Таңһчд бичкдүдин зөв харсдг элч Чужан Наталья, Хальмг Таңһчин социальн делгрлтин, күч-көлснә болн көдлмшәр тетклһнә министрин дарук Потолдыка Екатерина, Әрәсән социальн саңгин таңһчд үүлддг әңгин һардачин дарук Дорҗин Алла күүкд улсиг соньмсулҗадг төрмүдәр цәәлһвр өгв. Харһлтд орлцачнр көдлмшәр тетклһнә, бичкдүдиг асрҗадг өрк-бүлмүдиг дөңнлһнә халхар күцәгдҗәдг шаңһа көтлврмүдин, онц зөвтә керг-үүлдврмүдин тускар соньмсв. Психолог Шанкин Саглр күүкд улсла соньн күүндвр тогтаҗ, сүв-селвг өгв. Зәрм күүкд улс үрдиннь тускар ухалад, өдр-бүрин кергт даргдад, бийиннь тускар мартна, тегәд сул цаг олад, тааста кергәр соньмсхин, сергмҗтәһәр амрхин халхар өгсн селвгнь туста болв.
Харһлтын чилгчәр олна бәәдл-җирһлд орлцҗ, седвәртәһәр үүлддг күүкд улст «Негдсн Әрәсә» партин Күндллһнә һашгуд бәрүлҗ өггдв. Күүкд улс хамдан цә ууҗ, ямр нег төрәр дамшлтарн хувалцв. Харһлт үр-иньгин таалд давв, күүкд улст цецгүд белглв. «Негдсн Әрәсә» партин «Бат өрк-бүл» гидг төсвин йовудт экин Өдрт нерәдгдсн талдан чигн керг-үүлдврмүд болхмн гиҗ зуралгдҗана.

БАТАН Сәәхлә