Селәнәхн цусан өгчәнә

Эн сарин эклцәс авн «Цусна төв» бүрдәцин көдләчнр таңһчин райодар һарч йовад, эврә сән дурар цусан өгдг улсин төлә керг-үүлдвр бүрдәҗәнә. Селәнә әмтн эрүл-мендин бәәдлән шинҗлснә хөөн цусан өгнә.
Үкр сарин 6-д төвин шишлң бүрдәц Үстин районд одв, тенд 77 бәәрн күн цусан өгв. Маңһдуртнь төвин мергҗлтнр Яшкуль селәнд ирв, тенд 71 күн эврә сән дурар цусан өгәд, гемтә болн зеткрлә харһсн улст дөңгән күргв. Үкр сарин 11-д болн 12-т Лаганя района әмтн эн кергт бас орлцв. Темдглхәс, районд 20 күн түрүн болҗ цусан өгәд, донормудын зергләнд орв. Үкр сарин 13-д болн 14-д төвин көдләчнр Хар Һазра районд көдлв. Энд бас зун шаху күн цусан өгв, теднәснь дөрвнь түрүн болҗ эн кергт орлцв. Эн өдрмүдт төвин мергҗлтнр Сарпан болн Көтчнрә райодт көдлҗәнә. Энд бас эврә сән дурар цусан өгдг улс баһ биш.
Иим улсин тоод баһчуд олн бәәхнь темдгтә. Әрәсән УФСИН-ә Хальмг Таңһчд үүлддг заллтын муниципальн хоорндк Лаганя әңгин көдләч Очр-Һәрән Николай (зургт) хөрвн тавн дәкҗ цусан өгв. «Иим кергт орлцад, цусан өгәд күнд бәәдлд туссн улсин әм аврч чадхв гиҗ ицнәв. Насни дигт күрсн күн болһн эврә сән дурар цусан өгч чадна. Эдн эрүл-мендин бәәдлән шинҗлҗ, дару-дарунь эмчнрт бийән үзүлнә. Мана цусн кенд кергтә болхнь меддг арһ уга, болв гемәс эдгхд туслхнь чинртә болна», гиҗ баахн донор келнә. Келхд, Очр-Һәрән Николай дәкәд арвн тавн дәкҗ цусан өгснә хөөн «Әрәсән ачта донор» гидг нер зүүҗ онц зөвтә болхмн.
Эн җилин чилгчәр «Цусна төв» гидг Хальмг Таңһчин бүрдәцд бат ясврин көдлмш төгсхмн. Хальмг Таңһчин социальн-экономическ делгрлтин онц көтлврин йовудт эмнлһнә бүрдәцд бат ясвр келһнд орн-нутгин хазнас 213,6 сай арслң йилһгдсмн. Эн бәәрн эдлврт орулгдснас авн ясгдад уга бәәсмн, тегәд тосхачнр цусан өгдг улсин болн төвин көдләчнрин төлә сән таал тогтаҗана. Бат ясвр кегдҗәхәс нань төвд шин кергсл бас углҗ тәвгдхнь темдгтә.
ДООҖАН Наталья