Төрскнч седклтә баһчудыг өскхәр

Үкр сарин 15-д Советин Союзин Баатр, таңһчин һардач, генерал-лейтенант, нер туурсн цергә, орн-нутгин болн олна үүлдәч Басан Бадьминович Городовиковин 115 җилин өөниг Хальмг Таңһчд өргнәр темдглв. Басан Городовиков партин таңһчин комитетин негдгч сегләтр болад мана таңһчиг олн җилдән чадмгар һардҗ йовсмн.
Ончта өөниг угтҗ таңһчин кесг сурһульмудт һардачнрин селвгчнрин седвәрәр «Баатрин туурмҗта хаалһ» гидг кичәлмүд болв. Энүнд тууврин һашута җилмүдин хөөн таңһчин экономикиг ахр болзгт босхсн Басан Городовиковин алдр кергин тускар багшнр келв. Түүнә йовудт бичкдүд болн арвтнр «Басан Городовиковин үлдәсн зөөр» гидг төрәр наадна эв-арһар генерал-лейтенантын болн таңһчин һардачин намтриг улм гүүнәр дасч, соньн кесг тоотыг медҗ авв. Тер мет «Баатрин туск санл» гидг керг-үүлдврин йовудт сурһульчнр кесг төсвән күцәҗ, видеороликүд, презентацс белдв.
- Туурмҗта генерал болн таңһчин алдр һардач Басан Городовиковин өөнд нерәдҗ мана Яшкулин гимназьд, классин кичәлмүд болв. «Улсин генерал» гидг төрәр залу-зөргин кичәл давв. Сурһулин музейин һардач Бевинә Байрта 110-ч тойгта Хальмг дивизин дәәч хаалһд нерәдсн кичәл давулв, - гиҗ Яшкулин гимназин һардачин дарук Людмила Романенко келв.
Тер мет Городовиковск балһсна олн салврта гимназьд Басан Городовиковин өөнд нерәдсн регионмуд хоорндк төрскнч седклин ик хург болв, түүнд гимназьлә нөкцлт бәрдг Луганск Улсин Республикин багшнр болн сурһульчнр орлцв. Тер мет Городовиковск района толһач Абушинә Валерий, сурһуль-эрдмин заллтын, цергә комиссариатын, ДОСААФ-ин, «Бичкндк цагин навигатормуд» гидг олна бүрдәцин көдләчнр, таңһчин райодас болн Сарпулин һазрас ирсн күндтә гиичнр эн кергт бас орлцв.
«Мана гимназиг төгсәсн, СВО-н йовудт залу-зөргтәһәр дәәлдәд, әмән өгсн Сюкинә Сергей, Денис Михайлусь болг Цуглинә Александр баатрмудын санлынь тевчәд, партс секгдв. Эднә элгн-саднь, күүкднь, багшнрнь болн хамдан сурчасн үүрмүднь иигәрән ирв. Нанла хамдан чигн нег баатр сурч йовла. Элгн-саднднь болн күүкдтнь тернь ик үүмәтә йовдл болв. Теднд үлгүр болҗ йовсн генерал-лейтенант, Басан Городовиковин санлд нерәдҗ бүкл эрс секгдв», - гиҗ гимназьд болсн өөнин керг-үүлдврин тускар сурһулин һардачин селвгч Наталья Шевцова келҗ өгв.
Тер мет Городовиковск балһсна гимназин эклц классин багшнр Л.Плугова болн Н. Фоменко «Орлята» җисәнә кемҗәнд таңһчин тууҗд орсн Басан Городовиковин җирһлд учрсн кесг йовдлд нерәдсн кичәл бүрдәҗ. Талын келнә багш О.Мучаева «Городовиковихнә өрк-бүлин тускар» 5-ч класст соньн кевәр келҗ өгв.Технологин багш Е.Куликова «Движение первых» җисәнә сурһульчнрла хамдан ирсн гиичнрин төлә «Баатрмуд хөөтк үйнрин зүркнд» гидг керг-үүлдвр бүрдәв.
«Дәәнә цагин соньн эрдмин тускар» гидг классин кичәлин йовудт нүүрләчнрлә болн гимназин һардачин селвгч Н.Шевцова төрскнч сурһмҗин төрәр сурһульчнрла күүндв.
Санлын керг-үүлдврмүдин ашар гимназин һардач Виктория Лайпанова цугтаднь ханлтан өргв. Тиим кевәр баатрмудын туск санл кесг үйиг хамцулҗ, эврә һазрин болн орн-нутгин тууҗан хадһллһнд туслҗана.
Басан Городовиковин өөнд нерәдәд Городовиковск балһсна гимназин юнармейцнр гиичнрин төлә эв-дован, цергә белдврән үзүлҗ марһлдв.
ТҮРВӘН Һуна