Хальмгин хәәртә үрнә нерн мөңк

Шидр Советин Союзин Баатр, алдр генерал Басан Бадьминович Городовиковин 115 җилин өөн темдглгдв. Нертә үүлдәчин өөн угтад, таңһчин сурһулин бүрдәцсәр олн керг-үүлдврмүд болн харһлтс болв.
Үкр сарин 15-д Ф.Г.Поповин нертә Башантан колледжин багшнр болн оютнр Городовиковск балһснд Басан Бадьминовичин бумблвин өөр цуглрад, энүнә санлынь тевчв. Городовиковск района толһач Абушинә Валерий баһчудт Советин Союзин Баатрин тускар келҗ, төрскн һазрин тууҗд орсн нердиг мартхмн биш гиҗ темдглв. Городовиковск балһсна толһач Окуна Артем болхла Б.Б.Городовиковин туурмҗин болн күцәмҗин тускар тодрхаһар цәәлһҗ келв.
Маңһдуртнь Хальмг Таңһчин ачта улсин Хүүвин элчнр, күч-көлснә ветеранмуд, Б.Б. Городовиковин дуудврар таңһчд ирсн улс, оютнр болн сурһульчнр Элстин төвд Баатрмудын аллейд болсн, санлын керг-үүлдврт орлцв. Терүнд орлцачнр Б.Б.Городовиковин үүлдврин тускар тодлад, баһчуд энүнәс үлгүр авад, кергән даавртаһар күцәхинь келв. Митингин чилгчәр цуһар алдр генералын бумблвд цецгүд тәвв.
Тер мет Калининградын мүҗин Краснознаменск балһснд 2021 җилд Басан Городовиковд босхгдсн бумблвин өөр бас санлын керг-үүлдвр болв (зургт). Басан Бадьминович мана таңһчин бәәтхә цуг орн-нутгин тууҗд орснь лавта. Ветеранмуд, сурһульчнр генералын ач-тусинь онц темдглҗ, бүлән үгән келәд, гүрмр цецгүд тәвсмн. Цергә шишлң керг-үүлдврт орлцач, полковник, нег һазра Ширинә Николай Краснознаменск балһснд болсн митингд орлцснь бахмҗта болв.
Алдр генералын, Хальмгин хәәртә үрнә нериг мана таңһчд Хальмг ик сурһульд, тер мет сурһулин кесг бүрдәцст зүүлһгдв. Терүнәс нань Элстин болн райодын селәдин кесг уульнцс энүнә нер бас зүүнә. 2021 җилд Хальмг Таңһчин Толһач Хаска Батун седвәрәр мана региона делгрлтд ик тәвцән орулсн улсиг Советин Союзин Баатр Б.Б.Городовиковин орденәр ачлхин төлә шишлң зәрлг батлгдв. Эн седвәриг цуһар дөңнҗ батлсн болдг.

КАРСАНА Евгения