Цергчнрт белгән нерәдв

Хальмг Таңһчин әмтнә социальн теткврин хамцу төвин «Өрк-бүл» гидг әңгд сарин туршарт «Ангелочек на СВО» гидг керг-үүлдвр болв. Олн үртә, баһ тетквртә болн җирһлин күнд таалд туссн өрк-бүлмүд эн кергт орлцҗ, цергә даалһвран күцәҗ йовдг нег һазра улсиг дөңнҗ наадһас кев.
Төвин мергҗлтнр бичкдүдлә болн теднә эк-эцкнрлә хамдан наадһас кеҗ, һарин кегдлмүд дәәчнриг бу болҗ шавас харстха гиҗ бичг бичәд зургуд зурв. Эдн үүл бәрҗ ке-сәәхн кегдлмүд кесн деерән цергчнрт цаһан седклән медүлҗ, буйнта кергт орлцснь төрскнч сурһмҗта болв. Наадһас болн бичгүд белдсн деерән «Өрк-бүл» гидг әңгин мергҗлтнр болн өрк-бүлмүд цергчнрт хот-хол цуглулҗ йовулв. Бичкдүдин һарар кесн наадһас мана цергчнрин әминь аврад, әмд-менд хәрҗ ирхд туслтха гиҗ төвин көдләчнр темдглв.