Өөдәнәр ачлгдв

Одахн орн-нутгин Президент Владимир Путинә зәрлгәс иштә Хальмгин суңһврин комиссин сегләтр Наталья Федорченко Әрәсән суңһврин халхин ачта көдләчин нер зүүв.
Наталья Дмитриевна суңһврин халхар һучн һар җилдән көдлҗәнә. Хамдан көдлдг үүрмүд дунд эн күндтә болн тоомсрта мергҗлт болҗ тоолгдна. Әрәсән ЦИК-ин ахлач Элла Памфилова байрин бәәдлд ачлвринь бәрүлҗ өгв (зургт). Эн өөдән чинртә ачлвр мана орн-нутгт 2024 җилд батлгдв. Наталья Федорченко болхла иим өөдән нер зүүсн түрүн улсин тоод орв. Суңһврин керг-үүлдвриг белдлһнд болн давуллһнд ик тәвцән орулсн, тер мет эврәннь үүлдвртән күцәмҗ бәрсн улс эн ачлврар темдглгдх зөвтә.
Тер мет Хальмгин делегац Әрәсән ЦИК-ин Цугәрәсән селвлцәнд орлцв. Терүнд 2026 җилд болх суңһврин тускар күүндвр болв. Сүүрт орлцачнр дамшлтарн хувалцҗ, суңһврин йовудт олзлгдх шин эв-арһсин тускар селвлцв.
ОЛЬДАН Цаһан