Юстицин көдләчнриг йөрәв

Шидр Элстд мана таңһчд делкән юстиц бүрдснәс авн 25 җилин өөнд нерәдсн байрин хург болв. Хальмг Таңһчин Хуралын (Парламентин) ахлач Артем Михайлов, залврин ахлач Босхмҗин Гилән, энүнә дарук Өлзәтин Марина, ЮФО-д Әрәсән Президентин элч, ах инспектор Александр Беляев, цергллтин ветеранмуд, зарһсин көдләчнр, йосна элчнр болн талдан гиичнр терүнд орлцв.
Хальмгин Толһачин һардврин ахлачин дарук Тарбан Савар таңһчин Толһачин йөрәлиг олнд соңсулҗ умшад, Ханлтын бичгүд бәрүлҗ өгв. Тер мет ЮФО-д Әрәсән Президентин элч, ах инспектор Александр Беляев олна йөрәлин үгд багтад, хөрн тавн җилин туршарт юстицин халхар батлгдсн ул-сүүриг темдглв.
– Эндр Хальмгин зарһин халх таңһчин экономик делгрүллһнлә батар залһлдата. Баахн зарһчнр ах улсин үүрмүдәсн үлгүр авч, үнн-чик седклтәһәр кергинь цааранднь даавртаһар давулҗана. Мел эдн, баһчуд, төрскн һазрин тууҗд болн делгрлтд тәвцән орулҗ көдләд бәәхлә сән йовдл болхнь лавта, – гиҗ темдгләд, Гилән Герасимовна ончта өөнлә йөрәв.
Таңһчин Деед зарһин ахлач Саңһҗин Артур зарһин делкән халхин тууҗиг тодлулв. 2000 җилд мана таңһчд зарһин 12 әңг үүлддг билә, эндр болхла цуг муниципалитетмүдт 19 ирлцңгү әңг көдлнә. Бүтәгдсн кергүдин ик зунь мел делкән зарһчнрин медлд орна. Хөрн тавн җилин туршарт ут тоодан нег сай һар керг хәләгдв, гиҗ Артур Владимирович темдглв.
Зарһин халхд тәвцән орулсн Элстин болн райодын зарһин әңгүдин көдләчнр Күндллһнә темдгүдәр ачлгдв. Темдглхәс, Хальмгин делкән юстицин цергллтин һардач Натра Бадм түрүн зарһчнр-ветеранмудыг йөрәһәд, ханлтан өргәд, белгүд бәрүлҗ өгв. Тедн дунд Андра Эрднь, Бальдинкинә Давид, Ендона Евгений, Нәдвдә Галина, Федор Дегтяренко болн талдан улс заагдв. Байрин хургин йовудт таңһчин нертә артистнр билг-эрдмәрн олыг байрлулв.

ОЛЬДАН Цаһан