Моңһл кинон Өдрмүд болв

Делкәд алдр Чиңһс хаана һарсн өдрлә Хальмг Таңһчд моңһл кинон Өдрмүд болв. Сойлын гегән-герлин чинртә эн төсв үкр сарин 20-әс авн 23 күртл болв. Ах-дү келн- әмтиг залһлдулҗадг эн төсв Хальмгт хойрдад күцәгдв. Хальмгин хәләһәчнр моңһл кинон үүлдәчнрин шин үүдәврмүдлә таньлдв.

Одахн «Калмыкия» зәңгллһнә агентствд Әрәсәд Моңһл элчллтин сегләтр Онон Чинбаяр болн «Евразия Арт Төвин» һардач Цагадинә Цевг моңһл кинон Өдрмүдлә ямаран үүлдвр күцәгдхин тускар седкүлчнрт келҗ өгв. Онон Чинбаярин үгәр, сойлын залһлданд эн төсв күцәлһн ик чинртә болҗана, Моңһлд кино ик делгрлт авчахин тускар эн келв. Эн төсвин йовудт моңһлын кинола таньлдулсн деерән сойлын болн гегән-герлин нань чигн керг-үүлдврмүд күцәлһн хойр келн-улсин залһлдаг батлҗахиг ончлҗ заав. Келхәс, Онон Чинбаяр бичәч, шүлгч болад нутгтан темдгтә күн болҗана. Цагтан Чинбаяр эврә барин һарциг Улан Баатрт барлҗ һарһҗасмн.
Эн төсвин йовудт үзүлгдх фильмсин тускар Цагадинә Цевг тодрхаһар келҗ өгсн билә.
Түрүн фильм «Эхлэл» («В начале») гиҗ нерәдгдсмн. Терүг режиссер Даваасамбуу цокч авсн мөн. Ахр эн фильмиг хәләсн әмтн тас талдан делкәлә таньлдҗ чадв. Урднь үзәд уга тоотыг эдн үзв. Олн зүсн төрмүдт оньг тусхасн фильм ухалх, тер сурврмудт хәрү өгх седкл зүүлһнә. Хойрдгч фильм «Архөвч» («В Тайге») гидг нертә. Булган әәмгт цокч авгдсн фильмд Моңһлын йиртмҗин ке-сәәхн тоот орман олв. Дәкәд болхла эн фильмд режиссер Жамьянсурэн кинон олн зүсн янз ниицүлҗ олзлснь өврмҗтә.
Нег уңг-тохма ахнр-дүүнр болҗадг орн-нутгин киног соньмсад хәләв.
Моңһл киног Көтчнрә района Ергенинский селәнд бас үзүлв. Тер мет Хар һазра района Комсомольский болн Адг селәдт бәәрн әмтнд моңһл режиссермүдин эн фильмсиг хәләдг арһ учрв.
Хальмгт һурвдад ирҗәдг Онон Чинбаяр Әрәсәд Моңһлын элчлә хамдан шар-шаҗна нарт-делкән хургт орлцсан тодлад, Моңһлын болн Хальмг Таңһчин хоорндк залһлдаг батллһнд туслх эн төсвиг цааранднь чигн дөңнәд, иргчдән Моңһлын хамгин соньн фильмс авч ирҗ үзүлгдх гиҗ иткүлв.

ҖИРҺЛИН Кермн