Олн зүсн төрәр цәәлһвр өгнә

«Медрл» ниицән «Төрскән харсачнр» саңла хамдан цергә шишлң керг-үүлдврт орлцачнрин болн ветеранмудын төлә гегәрүлгч харһлтс бүрдәҗ, олн зүсн лекцс умшна. Хулһн сарин чилгчәр эннь экләд, 400 һар цергчиг хамцулв.
«Төрскән харсачнр» саңгин, Олна дөңнлтин штабин болн «Дәәч» төвин талвңгудт эн харһлтс давулгдна. «Медрл» ниицәнә лектормуд, тедн дунд номин кандидатнр, психологуд, өрк-бүлин, күч-көлснә, гер-бүүрин халхсар болн талдан мергҗлтнр терүг давулна. Иим харһлтсин йовудт шинҗләчнр дамшлтарн хувалцҗ, соньмсулҗадг сурврмудт цәәлһвр өгнә. Үлгүрлхд, Б.Б.Городовиковин нертә Хальмг ик сурһулин багш, экономикин номин кандидат, доцент Берикә Наталья социальн халхар мөңгнә дем өглһнә тускар цәәлһҗ келв.
«Медрл» ниицәнә Хальмгин әңгин һардач Манҗин Элеоноран темдглсәр, ирлцңгү керг-үүлдврмүдин йовудт Төрскән харсачнр лекцс соңссн деерән хоорндан күүндәд, цергә үүрмүдтәһән харһдг болв.
– Кесг сар хооран нег һазра мана көвүд Төрскән харсч йовла, өдгә цагт болхла эдн хәрҗ ирәд, өөрхн улстаһан хамдан эвин таалд бәәдг дасна. Эн туст орн-нутгин һардвр эдниг дөңнхин төлә олн эв-арһс олзлна, – гиҗ «Дәәч» төвин һардач Җаңган Чимид келнә.
СВО-д орлцачнрин болн ветеранмудын төлә ирлцңгү керг-үүлдврмүд 2025 җил төгстл цаарандан давулгдхмн.

КАРСАНА Евгения