Йосна болн олна хоорндк залһлдаг батрулхар

Сүл һурвн җилин эргцд шаңһа бүрдәцс кеҗ-күцәҗәдг керг-үүлдврмүдин тускар ниигмин сүлҗәнд зәңглҗ, иргнмүдлә бат залһлда бәрх йоста болҗана. Тегәд ода шаңһа болн бәәрн һазрт йос заллһна бүрдәцс ниигмин сүлҗәнд шишлң халхс секч, бәәрн улсиг соньмсулҗадг , бачм чинртә зәңгллһиг олнд күргҗ медүллһнә дааврта керг күцәҗәнә. Оңданар келхд, ирлцңгү кергин ашт кен-негнәннь төр сән таларн хаһлгдх зөвтә гисн неквр тәвгдҗәнә.
Шидр Элстд таңһчин райодын йосна бүрдәцсин, SММ-мергҗлтнрин болн то-дигин халхар нертә шинҗләчнрин орлцлһтаһар эн туст күцәгдсн керг-үүлдврин ашинь диглсн наадм давулгдв. Энүнд орлцачнр ниигмин сүлҗәнд күцәдг көдлмшин халхар учрсн шинрлтин тускар хоорндан күүндҗ, дамшлтарн хувалцҗ, иргч зураһан батлв.
Хальмг Таңһчин Толһачин һардврин ахлач Кирилл Попов, РФ-н сенатор Байир Путеев, Хальмг Таңһчин Улсин Хуралын (Парламентин) Ахлачин дарук Бадмин Вячеслав, Приютна района толһач, Хальмг Таңһчин муниципальн бүрдәцсин Хүүвин правленя гешүн Манҗикә Басан болн таңһчин ЦУР-ин һардач Бадан Бадм эн наадмд орлцачнриг йөрәһәд, йосна болн олна хоорндк залһлдана чинринь онц темдглв. Наадмин йовудт ниигмин сүлҗәнд һардврин, сурһуль-эрдмин, сойлын, эрүл-менд харлһна, социальн цергллтсин халхар үүлддг хамгин шунмһа көдләчнр дииләчнрт заагдҗ, Ханлтын бичгүдәр ачлгдв.
Энүнәс нань ирлцңгү керг-үүлдврин эклцәр ЦУР-ин тавн җилин өөн темдглгдв. Эн җилмүдин туршт Төв шаңһа туслмҗиг то-дигин халхд оруллһна болн олна дунд ниигмин сүлҗәнә кергиг делгрүллһнә туст күцәмҗтәһәр көдлҗәхинь бас үнлсмн. Төвин һардач Бадан Бадм йосна бүрдәцсин олзта-туста көдлмшин болн әмтнә җирһл ясруллһна халхар шин эв-арһс ик чинр зүүҗәхин тускар келв.
Цуглрсн улсиг таңһчин билгтнр байрлулв.
Шагҗин Любовь