Ачта донормуд болв

Шидр Элстд 37 күн олн җилин туршарт эврә сән дурар цусан өгч, кесг күүнә әм аврсн төләдән «Әрәсән ачта донор» гидг нер зүүв. «Негдсн Әрәсә» партиг дөңнлһнә олна штабд болсн харһлтд ачта донормудыг ачлҗ, темдгинь бәрүлҗ өгв. Ачлвр авсн улс дунд УФСИН-ә, МЧС-ин, дотр-дундын кергүдин бүрдәцсин, эрүл-менд харлһна, сойлын көдләчнр, зарһин приставмуд болн таңһчин селәдин эгл улс билә.
Мергҗлтнрин кесн шинҗллтин ашар эврә сән дурар цусан өгсн нег күн баһ гиснь зун һар күүнә әм аврдгчн. Нилхд, медәтнр, зеткртә йовдлд туссн, күнд гемтә улст эднә цусн керглгднә. Донормуд түрүн сурврар цусан өгхдән даңгин белн бәәнә. Тер төләд эдн эрүл-мендин бәәдлән дару-дарунь шинҗлҗ, олн зүсн гемәс саглҗ цогц-махмудан батрулна. Баһ гиснь дөчн дәкҗ цусан өгсн улс Әрәсән ачта донормуд болад, онц зөв эдлнә, эднд җилд нег дәкҗ демин мөңгн өггднә.
«Цусна төв» бүрдәцин ах эмчин дарук Дорҗин Софья, Әрәсән Улан Кирсин Хальмгин әңгин ахлач Пүрбән Олег, «Хальмгин донормуд» олна ниицәнә ахлач Манҗикә Басң болн «Иргчин төлә» буйнч седклин саңгин һардач Утән Дмитрий эврә сән дурар цусан өгдг улст ханлтан өргҗ, эднә өр-өвч седклтә керг олнд туста болҗахиг темдглв.
Көтчнрә района Чкаловский селәнд бәәдг Улана Санл оютн бәәсн цагтан түрүн болҗ цусан өгсмн. Оютнр эврә сән дурар цусан өгәд, хойр өдртән кичәлмүдәс сулдхгддг бәәсмн, тегәд тер зөвиг олзлад герүрн хәрҗ экдән нөкд болхҗасан залу күн тодлна. Хөөннь селәнә эдл-ахуд болн района электрокүчәр тетклһнә бүрдәцд көдлдг цагтан бас җил болһн цусан өгдг бәәсмн. Района эмнлһнд күнд гемтә күүнд цусн кергтә болад терүнә әм аврхар түрүн дуудврар цусан өгч, дөң болдг бәәсмн. Дөчн һар дәкҗ цусан өгәд, Улана Санл «Әрәсән ачта донор» гидг нер зүүв. Эн ода деерән ачта амрлһнд һарад уга, күүкдтән болн ачнр-зеенртән нөкд болҗ арһарн көдлнә. Района электрокүчәр тетклһнә бүрдәцд эн хөрн долан җилдән көдлсмн. Әрәсән ачта донорин нер зүүснә хөөн эн җилд нег дәкҗ 18 миңһн арслңга дем авхмн, санаторьт амрч чадхмн. «Мана эцк олн җилин эргцд эврә сән дурар цусан өгчәнә. Баһ цагасн авн эн кедү күүнд дөң болсиг тоолҗ болшго. Эврәннь цусан талдан улст өгдг улс зөргтә, цаһан седклтә улс мөн», гиҗ күүкнь келнә.
«Иргчин төлә» гидг буйнч седклин саң, «House of flowers» «Coffee house Lotus» цецгүд хулддг лавкс донормудт белгүд белдҗ эдниг байрлулв.

БАТАН Наталья