Энд сән мергҗлтнриг белднә

Давсн долан хонгин чилгчәр Элстин политехникин колледжин 60 җилин ончта өөниг багшнр болн оютнр өргнәр темдглв.
Ода орн-нутгт хамгин түрүнд техникин халхар бат медрл өгх күсл тәвгдҗәнә, тиим даалһвриг орн-нутгин һардвр болн Әрәсән залвр өгчәнә. Яһад гихлә ода шин эв-арһсин, йоста биш ухалврин цаг ирҗ йовна. Тегәд техникин сурһуль-эрдмтә мергҗлтнр ода хамгин түрүнд керглгдҗәнә. Мана таңһчин залвр бас тиим неквр тәвҗәнә. Ода зәңгллһнә халхар көдлдг улс кергтә болҗана. Тер эрдмтә мергҗлтнриг Элстин политехникин колледжд дасхна, энд өдгә цагин лабораторьмуд болн компьютерин классмуд бәәнә, дамшлтта багшнр бат медрл өгнә.
Тер мет политехникин колледжд хаалһ тосхачнриг, электрикүдиг, маши ясачнриг нань чигн эрдмтә мергҗлтнриг белднә, тер көдлмшиг 60 җилин туршарт эн колледж күцәҗәнә.
Нааран юм меддго көвүд-күүкд ирәд, һурвн-дөрвн җил болад хату цаасан авч, таңһчин экономикин кесг халхар көдлнә.
Политехникин колледжд (урднь эн политехникум, дәкәд автохаалһин техникум болад үүлдҗәлә) 45 җил хооран яһҗ сурчасна тускар 1980 җилд энүг төгсәсн, урднь таңһчин тосхлтын министрәр көдлҗәсн Җанҗин Виктор тодлҗ келв: «Дигтә дөчн йисн җил хооран бидн, 14-15-та арвтнр, техникумд сурхар ирләвидн. Юм меддго маднд багшнр шишлң кичәлд бат медрл өгәд, сән мергҗлтнриг белдәд, җирһлин чик хаалһд һарһла. Көкән Екатерина мадниг хаалһ тосхлһна эрдмәр сурһла, Ольга Кузьминова тосхлтын кичәлмүд давулдг билә. Физикәр мадниг Борис Лучин дасхсн болдг. Тер мет геодезийәр, механикәр болн талдан чигн халхар бат медрл авлавидн. Элстин тосхлтын кесг бүрдәцд дамшлт хоршалавидн. Тосхлтын багин ханьд селәнә эдл-ахун объектс тосхчалавидн. Эн җилин хөн сарин 10-д техникум төгсәһәд дигтә 45 җил болв.
Байрин хургин эклцәр политехникин колледжин цуг багшнриг, оютнриг болн ветеранмудыг колледжин һардач Васькинә Галина йөрәв. 1965 җилд политехникумд 240 күн ирҗ кесг эрдм дасла. Ода 12 эрдмәр баһчудыг энд белднә, эдниг Элстин болн таңһчин тосхлтын бүрдәцст икәр күләнә. Менглинә Павел, Павла Борис, Шевкин Борис болн нань чигн һардачнр чадмгар үүлдәд, колледжин делгрлтд ик нилчән күргв, гиҗ Галина Васильевна темдглв. Колледжин оютнр җил болһн «Профессионал» болн «Абилимпикс» марһаст орлцҗ, медрлән болн мергҗлтән үзүлҗ, дииләчнрт заагдна.
Түүнә тускар таңһчин залврин Ахлач Босхмҗин Гилән бас темдглсн болдг. Ода колледж таңһчин СПО-н халхар нүүрлгч орм эзлҗәнә. Тосхлтын болн экономикин нань чигн салврин төлә кергтә мергҗлтнриг энд белднә, тернь колледжин багшнрин болн эрдмчнрин ач-тус болҗана гиҗ Гилән Герасимовна эврәннь йөрәлин бичгт темдглв. Тер бичгинь таңһчин залврин Ахлачин дарук Өлзәтин Марина умшад, залврин Күндллһнә һашгар колледжин багш Муняна Байртаг ачлв.
Тер мет Элст балһсна толһач, балһсна Хургин ахлач Максим Сорокин бас йөрәһәд, колледжин мергҗлтнрт болн эрдмчнрт Элст балһсна толһачин Күндллһнә һашгуд бәрүлҗ өгв.
Таңһчин сурһуль-эрдмин болн номин министрин дарук Натра Антон, таңһчин сурһуль-эрдмин көдләчнрин профсоюзин ахлач Эдән Цаһан колледжин коллективиг өөнлә йөрәҗ, белгән бәрүлҗ, нүүрлгч багшнриг болн ветеранмудыг Күндллһнә һашгудар бас ачлв.
Иргчдән колледжд белдҗәдг эрдмчнрин чинрнь холванд өсәд бәәх гиҗ сангдна.
ТҮРВӘН Һуна