Зун наста көгшәг йөрәв

Шидр Хальмг Таңһчин Толһач Хаска Бату зун наста көгшә Манҗин Нинаг йөрәв.
Арвн зурһатадан Нина Горяевна экләд көдлв, тер цагт эцкнь болн ахнь фронтд дәәлдҗ йовсмн. Дәәнә цагиг болн Сиврин туувриг дааҗ һарад, дөрвн үрән өскәд, эндр йисн ач-зееһин болн нәәмн җич-зеенчин күцәмҗнь энүнә төлә бахмҗта болна.
– Манҗин Нина бичкнәсн авн күнд көдлмшт йовв, «Төрскән харсгч Алдр дәәнә цагт туурмҗта күч-көлснә төлә» медаляр ачлгдв, күч-көлснә ветерана болн потребкооперацин ачта көдләчин нер зүүнә. Энүнә бәәдл-җирһл дорас өсч йовдг баһчудт үлгүр-үзмҗ болна. Келхәс, Нина Горяевна мини аав-ээҗиг сәәнәр меддг билә, теднә тускар нанла тодлврарн хувалцв. Күндтә ээҗиг ончта өөнләнь йөрәһәд, өөрхн элгн-садтаһан амулң эдлҗ йовхинь дурдҗанав, – гиҗ Бату Сергеевич темдглв.
ОЛЬДАН Цаһан