«Бичкн Төрскн – Әрәсән күчн»

Шидр Түмнә мүҗд «Бичкн Төрскн – Әрәсән күчн» Цугәрәсән муниципальн хургин региона Өдрмүд болв. Әрәсән бәәрн залврин делгрлтин негдлтин (ВАРМСУ) седвәрәр болсн керг-үүлдврт орн-нутгин регионмудас ут тоодан 350 күн орлцв. Ик хургт муниципальн бүрдәцсин, орн-нутгин болн регионмудын йосна бүрдәцсин, парламентсин, олна ниицәсин элчнр цуглрв. Хальмг Таңһчас «Хальмг Таңһчин муниципальн бүрдәцсин хүүв» гидг негдлтин ахлач, Октябрьск района муниципальн бүрдәцин толһач Увшан Басң терүнд орлцв.
«Урбанистика и архитектура: создавая будущее» гидг төрәр бүрдәгдсн керг-үүлдврт Түмнә мүҗин Толһач Александр Моор орлцад, эднә регион тосхлтын халхд ик күцәмҗ бәрҗәхиг темдглв. «Өдгә цага балһсдт әмтнә җирһлин төлә цугнь тааста болх зөвтә. Бәәрн улс бийснь эврә һазран кеерүлҗ делгрүллһнә кергт шунмһаһар орлцхиг бидн дөңннәвидн. Әмтнә седвәрлә ирлцҗ балһсд өдгә цага некврин кев-янзар тосхгдх болн делгрх зөвтә», гиҗ региона һардач келв. Дотр-дундын кергүдәр бәәдг Әрәсән Президентин һардврин ахлачин дарук Евгений Грачев эн керг-үүлдвр бүрдәснд ханлтан өргәд, муниципалитетмүд хоорндан сән гисн дамшлтарн хувалцҗахнь ик чинр зүүҗәнә гив.
Ик хургт орлцачнр балһсна делгрлтд нерәдгдсн төрмүдәр болсн лекцст, «төгрг ширән» сүүрт орлцв. Тер мет эдн Түмнә мүҗд күцәгдҗәдг төсвслә таньлдв. ВАРМСУ-н ахлач Ирина Гусеван келсәр, эн мүҗд балһсна делгрлтин төрәр ик хург бүрдәснь учрта. Эдн балһсна болн архитектурин делгрлтин туст ик күцәмҗ бәрснь үзмҗтә.
Региона Өдрмүдт хәләгдсн төрмүд хөөннь 2026 җилд мөрн сард Москва балһснд болх Цугәрәсән муниципальн ик хургин көтлврт орхмн. Терүнә йовудт Әрәсән Президент Владимир Путинә седвәрәр зарлгдсн «Служение» мөрән дииләчнр ачлгдхмн. Бәәрн залврин бүрдәцсин делгрлтин халхар күцәмҗтәһәр көдлҗәдг улс эн мөрәһәр ачлгдх зөвтә.
БАТАН Наталья