Делгә Эрднин санл тевчв

Хальмг Таңһчин Улсин Хуралын (Парламентин) Ахлач Артем Михайлов болн депутат Җаңһан Чимид Ростовск мүҗин Усть-Донецк района Раздорская күүтрт Советин Союзин Баатр Делгә Эрднин 103 җилд нерәдгдсн санлын керг-үүлдврт орлцв. Төрскән харсгч Алдр дәәнд әмнәсн хаһцсн улсин санлын бумблвин өөр эклсн хургт бәәрн улс цуглрад, залу-зөрмг кевәр дәәлдҗ йовсн баатрмудыг тодлад, тагчг зогсв. Хургт орлцачнр Делгә Эрднин бумбд цецгүд тәвв. Артем Михайлов Хальмг Таңһчин Толһач Хаска Батун илгәсн Бичг олнд соңсхч умшв.
Санлын хургин хөөн сойлын Герт болсн харһлтд Хальмг Таңһчин Улсин Хуралын Ахлач Артем Михайлов цергә шишлң керг-үүлдврт орлцачнрт Советин Союзин Баатр Делгә Эрднин медаль бәрүлҗ өгв. «Нег һазра мана баатрин санлын керг-үүлдврин йовудт болн Алдр Диилврин 80 җилин өөнин җилд Ростовск мүҗин улст Хальмг Таңһчин шаңһа ачлвр бәрүлҗ өггдҗәхнь ончта йовдл мөн. Эннь Әрәсән олн келн-улсин ниицлтиг болн иньгллтиг иткүлҗәнә», - гиҗ Артем Васильевич темдглв.
Таңһчин Улсин Хуралын депутат, Хальмг хазгудын одмн, цергә керг-үүлдврин ветеран Җаңһан Чимид бас хургт үг келәд, Усть-Донецк района буйнч седклтә улсиг «Фронтд дөң күргсн төлә» гидг медаляр ачлв. Эн хургт Усть-Донецк района һардвр, хазгуд, цергә керг-үүлдврин ветеранмуд болн олна бүрдәцсин элчнр орлцв. Харһлтын чилгчәр бәәрн болн Хальмгин билгтнрин хамцу концерт болв.
ДООҖАН Наталья